Aqtóbede qorǵanys isteri jónindegi departament bastyǵy taǵaıyndaldy

AQTÓBE. KAZINFORM — Ardaq Qumarov buǵan deıin Aqtóbe qalasy Astana jáne Almaty aýdandary qorǵanys isteri jónindegi biriktirilgen basqarma bastyǵy qyzmetin atqarǵan.

QR Qorǵanys mınıstriniń buıryǵymen polkovnık Ardaq Qumarov jańa qyzmetke taǵaıyndaldy. Ol Aqtóbe oblysynyń týmasy. QR Qarýly kúshteriniń áskerı akademııasyn jáne 2022 jyly zań ýnıversıtetin támamdaǵan.

— Áskerı qyzmetin vzvod komandırinen bastap, Qarǵaly aýdany áskerı komıssarıatynda áskerı komıssardyń orynbasary, áskerı komıssar, Hromtaý aýdany qorǵanys isteri jónindegi bólim bastyǵy qyzmetterin atqardy. Sonymen birge Batys Qazaqstan oblysy qorǵanys isteri jónindegi departamenti bastyǵynyń orynbasary boldy. Aqtóbe oblysy qorǵanys isteri jónindegi departamenti bastyǵy laýazymyna taǵaıyndalǵanǵa deıin Aqtóbe qalasy Astana jáne Almaty aýdandary qorǵanys isteri jónindegi biriktirilgen basqarma bastyǵy laýazymynda boldy. «QR Qarýly Kúshteriniń ardageri», I, II, III dárejeli «Minsiz qyzmeti úshin» jáne basqa da mereıli medaldarmen marapattalǵan, — dep habarlady Aqtóbe oblystyq qorǵanys isteri jónindegi departament.

Aıta keteıik, Aqtóbe oblystyq qorǵanys isteri jónindegi departament bastyǵy bolǵan Ádilet Otarbaev Túrkistan oblysyna aýysty. Buǵan deıin habarlaǵanymyzdaı, Baýyrjan Ábjanov Ulttyq qorǵanys ýnıversıtetiniń basshysy laýazymyna taǵaıyndaldy.