Aqtóbede kópsalaly aýrýhana qymbat baǵaǵa kereýetter satyp almaq bolǵan
AQTÓBE. KAZINFORM – Aqtóbedegi kópsalaly aýrýhana 488,2 mln teńgege 188 kereýet satyp almaq boldy. Baǵanyń naryqtan tym joǵary ekenin Aqtóbe oblysy boıynsha ishki memlekettik aýdıt departamenti anyqtap, zańsyzdyqty joıý jóninde uıǵarym berdi.
Aqtóbe oblystyq mamandandyrylǵan aýdanaralyq ákimshilik sotynda kópsalaly aýrýhanaǵa qatysty is qaraldy. Sotqa shaǵymdy Aqtóbe oblystyq kópsalaly aýrýhana túsirdi. Olar memlkettik satyp alý talaptarynda zańbuzýshylyq joq ekenin, kereýet satyp alý durys júrgizilgenin alǵa tartty. Al Aqtóbe oblysy boıynsha ishki memlekettik aýdıt departamentiniń bul ýájge óz aıtary bar.
- Kópsalaly oblystyq aýrýhanaǵa taýardy satyp alýdyń zańdylyǵy máseleleri negizinde aýdıtorlyq is júrgizilip, nátıjesinde bıýdjet qarjysynyń 286,1 mln teńgesi tıimsiz paıdalanylǵany anyqtaldy. Aqtóbe oblysynyń densaýlyq saqtaý basqarmasy shyǵys qujattaryna taldaý jasamastan Kópsalaly oblystyq aýrýhanaǵa 520 mln teńge bóldi. Aýrýhana 2023 jyly ónim berýshi usynatyn jáne onyń óndirýshi, resmı dıstrıbıýtor nemese óndirýshiniń resmı ókili mártebesin rastaıtyn shartynyń kóshirmesi nemese ózge de qujattaryn talap etpeı, «Kontýr HHІ» JShS-ne 488, 2 mln teńgeni negizsiz aýdarǵan. Al NITRO HB modeliniń NITRO HB 8140 serıaly elektrli kereýettiń 188 danasy úshin negizgi baǵa 202,1 mln teńge bolǵan. Sóıtip aqsha 286 117,2 myń teńgege artyq aýdaryldy. Nusqama berilip, aýrýhana onyń kúshin joıý úshin sotqa júgindi. Aqtóbe oblystyq mamandandyrylǵan aýdanaralyq ákimshilik soty aýrýhana shaǵymyn qaraǵattandyrmady. Al Aqtóbe oblystyq soty Aqtóbe oblystyq mamandandyrylǵan aýdanaralyq ákimshilik sotynyń sheshimin ózgerissiz qaldyrdy. Ári qaraı departament tarapynan zańbuzýshylyqtardy qalpyna keltirý sharasy qabyldanady, - dedi Aqtóbe oblysy boıynsha ishki memlekettik aýdıt departamentiniń basshysy Sáken Qasymov.
Sot qaýlysy zańdy kúshine engen soń aýrýhana ákimshiligi kereýetti jetkizgen kompanııadan artyq shyǵyndy keri qaıtarýy tıis.
Aqtóbe oblystyq sotynyń baspasóz qyzmeti taratqan aqparatqa súıensek, aýrýhana 2023 jyldyń qazan aıynda elektr qýatymen jumys isteıtin medıtsınalyq kereýetterdi satyp alýǵa tender ótkizdi. Alaıda tender ótkizilmedi dep sanaldy. Óıtkeni oǵan «K» atty JShS-nen bir ǵana ótinim tústi. Osyǵan baılanysty aýrýhana taýardy jalǵyz jetkizýshiden satyp alý týraly sheshim qabyldady. Ári qaraı 488 217 200 teńge somasyna 188 tósek jetkizýge shart jasaqtalǵan. Aýdıt qorytyndylaryna sáıkes aýrýhana tenderdi qorytyndylaý merzimderin buzdy, shekti baǵany anyqtaý úshin kommertsııalyq usynystar bermedi jáne medıtsınalyq jabdyqtyń qunyn taldaý úshin eskirgen derekterdi paıdalandy. Budan basqa baǵany kótergeni anyqtalyp, bul 286 117 200 teńge somasyna bıýdjet qarajatyn tıimsiz paıdalanýǵa ákelgen.
Aıtyp óteıik, sot qaýlysy Joǵarǵy sotta qaralaýy múmkin. Aýrýhana ákimshiliginiń 1 aı ýaqyty bar. Sottaǵy derekterge súıensek, kereýetter 2023 jyly satyp alynyp, emdeý ornyna jetkizilgen.
Eske salsaq, Aqtóbe oblysy Shalqar aýdandyq bilim bóliminiń basshysy qyzmetin asyra paıdalanǵany úshin sottaldy. Ol mektep dırektorynan aqsha jınatyp, jumsap jibergen.