Aqtóbede kópqabatty úılerdiń qabyrǵasyna sýretter salyna bastady
AQTÓBE. QazAqparat - Aqtóbede bir-birine syrt kelbeti uqsas kópqabatty turǵyn úıler kóp. Jergilikti ákimdik qala kórkine sán berý úshin almatylyq sýretshilerdi shaqyrdy, dep habarlaıdy QazAqparat tilshisi.
Aqtóbedegi kópqabatty turǵyn úılerdiń syrt kelbetin ózgertý úshin Almaty qalasynan eki sýretshi keldi. Erjan Tanaev pen Aqqalı Zakırov qazir Aqtóbe qalasyndaǵy Sáńkibaı batyr dańǵylynda ornalasqan 9 qabatty turǵyn úıdiń syrtyna qonaqjaı qazaq boıjetkenniń sýretin salyp jatyr.
«Biz jumysty bir apta buryn bastaǵan edik. Keıin jel boldy, jańbyr jaýdy. Qatty jel bolǵan kezde boıaý ushyp, sýretti salýǵa kedergi keltirdi. Ári biz qarapaıym sýretshilermiz. Bıikte jumys isteý qorqynyshty. Qazir aýa raıy keremet. Sýrettiń negizgi jumysy aıaqtaldy. Aldaǵy ýaqytta kelinshek kıgen kamzoldyń oıý-órnekterin salyp, janyndaǵy meshit pen shaqyraq beınelengen qalanyń kórikti jerin aıaqtaımyz. Bul jer ushaqta jaqsy kórinedi eken. Qonaqjaılylyqty bildirý úshin osy turǵyn úı tańdalǵan. Ideıa jergilikti ákimdiktiki», - deıdi Erjan Tanaev.
Eki sýretshi, Erjan Tanaev pen Aqqalı Zakırovty Aqtóbe qalanyń ákimi Іlııas Ispanov shaqyryp, úlken jobany birlese atqarýǵa kelisti. Aldaǵy ýaqytta qalada turǵyn úılerdiń qabyrǵasyna taǵy birneshe sýret salynýy múmkin. Elbasy Nursultan Nazarbaevtyń Joldaýyna arnalǵan sýretti, Uly Otan soǵysynyń batyry Álııa Moldaǵulovanyń portreti men sport taqyrybyndaǵy birneshe týyndylardy osy sýretshiler salady.
«Aqtóbeniń úıleri bir-birine uqsas keledi eken. Mundaı sýretter salynsa, adamdar aýdandy, joldy tez ajyrata alady. Ári bul elimizde damymaǵan óner salasy. Strıt-art baǵytyndaǵy sýretti salý úshin aldymen emýlsııamen áktep aldyq. Keıin Reseıden ákelingen boıaýǵa toly ballondy paıdalanyp jatyrmyz. Sýretti jyl saıyn jańartýdyń qajeti joq. Bári aýa raıy men kún sáýlesine baılanysty. Sýret 3-5 jylǵa shydaıdy», - deıdi Erjan Tanaev.
Kazakhstan. Aktobe. 9 stages #9stages #process #graffiti #streetart #mural #muralart #art #aktobe
Elimizge strıt-art ónerin ákelip, damytyp júrgen eki Erjan Tanaev pen Aqqalı Zakırov Almatydaǵy Oral Tańsyqbaev sándik-qoldanbaly óner kolledjin,T.Júrgenov atyndaǵy óner akademııasyn bitirgen. Sýretshiler odaǵynyń múshesi.
«Maıly boıaýmen sýret salý hobbımizge aınaldy. Negizinen polıgrafııa, ıaǵnı, kórkem jazýmen aınalysamyz. Dızaınerlik baǵdarlamalardy bilemiz. Al strıt-art kóshedegi sýret bolǵanymen, bul adamdy ónerge shaqyrady. Kenepke salynǵan sýret mýzeıde, jeke adamnyń úıinde turady. Arnaıy kórmese, ol sol kúıi turady. Dalada salynǵan sýretti ótken-ketkenniń bári kóredi. Halyq ónerińdi baǵalaıdy. Aqtóbelikter jaqsy áserde. Tipti aerografııaǵa qyzyǵatyn qyz kelip, habarlasty. Áleýmettik jelilerdi de baqylap otyrmyz. Báriniń pikiri jaqsy», - dedi Erjan Tanaev.
Aıta keteıik, Aqtóbedegi birkelki úılerdi aldymen Elbasy Nursultan Nazarbaev synap, keıin oblys ákimi Berdibek Saparbaev jańa ádis-tásilderdi paıdalanýdy tapsyrdy.
