Aqtóbede kópqabatty úıge Dımash Qudaıbergenniń mýraly salynady
AQTÓBE. QazAqparat – Aqtóbe qalasyndaǵy kópqabatty úıge ánshi Dımash Qudaıbergenniń mýraly salynady. Sonymen birge ánshiniń jankúıerlerine arnap týrızm salasyn damytýǵa bolady, dep habarlaıdy QazAqparat tilshisi.
Aqtóbede qalany damytý jospary talqylandy. «Qazaqstannyń Q88 ýrbanıster qaýymdastyǵy» qoǵamdyq birlestigi shahardy abattandyrý tetigin usyndy. Tanystyrylym kezinde sarapshylar qala kóshelerine on art-nysan, shaǵyn arhıtektýralyq músin ornatý jolyn aıtty. Sonymen birge qabyrǵalarǵa sýret salý qajet. Alańdardyń, saıabaqtardyń ornalasý dızaınyn da kórsetti. Qoǵamdyq keńistikti damytý jobasy sheńberinde Áýe qorǵanysy kúshteriniń áskerı ınstıtýty aýmaǵynda ashyq aspan aıasynda ushaqtar murajaıyn, amfıteatr, balalar alańyn ornalastyrý usynyldy. Astana saıabaǵynyń aýmaǵynda jastar alańyn, qaladaǵy Táýelsizdik dańǵylynda 2,5 shaqyrymdyq saıabaq salý da nazarda bolady. Bókenbaı batyr dańǵyly boıynan halyqaralyq áýejaıǵa deıin sarmattar dáýirinen Qazaqstan handyǵyna deıingi tarıhymyzdy beıneleıtin art-nysandar ornalastyrylady. Aqtóbedegi kópqabatty úılerdiń qabyrǵalaryna Dımash Qudaıbergenge arnap mýral salýdy usyndy.
«Dımashty elimizdiń brendi deýge bolady. Aqtóbe — onyń týǵan jeri. Sondyqtan jankúıerleri bizdiń qalaǵa jıi kelip turady. Bul týrızm salasyn damytý úshin úlken múmkindik. Biz sony barynsha paıdalanýymyz kerek. Oblys ortalyǵy barlyq talapqa saı, demalý úshin barynsha qolaıly bolǵany jón»,- dep atap ótken E.Toǵjanov .
Sondaı-aq, óńir basshysy qoǵamdyq keńistik pen turǵyn úı alaptaryn damytý, qalanyń eski bóligindegi aýlalardyń aýmaǵyn abattandyrý suraqtaryna erekshe nazar aýdarý kerek dep sanaıdy. Soǵan baılanysty Janqoja batyr, Nekrasov, Kereev kóshelerine rekratsııalyq aımaqtar jasap, temirjol vokzaly aýmaǵy men sol mańdaǵy aýlalardy abattandyrý jobalary usynyldy. Tanystyrylymdy tyńdap shyqqan Eraly Toǵjanov túzetýler engizip, jobanyń júzege asyrylatyn merzimin naqtylaýdy tapsyrdy.
«Qala halqy kún saıyn kóbeıip keledi. Sondyqtan Aqtóbede bir mezette keminde 15 myń adam jınalatyn sharalardy ótkizýge arnalǵan oryn bolý kerek. Usynylyp otyrǵan jer - Elek ózeniniń jaǵasy. Osy jumysqa kirisý kerek. Turǵyndar qur sóz ben bos ýádeni estimeı, naqty jumysty kórý kerek»,- dedi oblys ákimi.
