Aqtóbede kópqabatty úıdiń qabyrǵasyna Abaı beınelengen mýral salyndy
AQTÓBE. QazAqparat – Aqtóbe qalasyndaǵy Abaı dańǵylynda aqynnyń 45 qara sózi jazylǵan taqta ornatylyp, mýral salyndy, dep habarlaıdy QazAqparat tilshisi.
Aqtóbe qalasy Abaı dańǵyly boıyndaǵy kópqabatty úıdiń qabyrǵasyna aqynnyń sýreti salyndy.
Bul sýretshi Tólegen Darbaevtyń týyndysy. Qajetti qural-jabdyqqa jergilikti kásipkerler qarjy bóldi.
«Abaıdyń beınesin salý - úlken jaýapkershilik. Úıdiń qabyrǵasynda sýret 10 jyl boıy syry ketpeı turatynyna kepildik beremin. Bul sýretke 40 maýsymǵa shydas beretin arnaıy sılıkon boıaý qoldanyldy», - deıdi sýretshi. Tólegen Darbaev buǵan deıin «Batyr jyry» sýretin, Álııa - Mánshúk beınelerin úılerdiń qabyrǵasyna saldy. Osylaısha, ol qalanyń kórkin keltirýge úles qosyp júr.
Aıta keteıik, Abaı dańǵylynda buǵan deıin 45 qara sóz jazylǵan taqta ornatylyp, shaǵyn kitap qoıyldy. Kishi sáýlet nysanynda bir shýmaq óleń jazylǵan. Bul demeýshilerdiń tartýy boldy. Ári dańǵyldaǵy sýburqaq jóndelip, iske qosyldy.
