Aqtóbede kópqabatty úıdiń aýlasynda áıeldi pyshaqtap ketti
AQTÓBE. KAZINFORM — Kúdikti ustalyp, tergeý ızolıatoryna qamaldy. Áıel men er adam burynnan tanys bolǵan.
Oqıǵa keshe Aqtóbe qalasyndaǵy kópqabatty úılerdiń birinde boldy. Beınebaqylaý kamerasynan er adamnyń áıel janyna baryp sóıleskenin, keıin áıel ornynan turyp ketkende artynan pyshaq suqqanyn kórýge bolady. Odan ári súırep, qýysqa alyp ketken.
— Atalǵan fakti boıynsha qylmystyq is qozǵaldy. Aqtóbe qalasynda áıeldi óltirdi degen kúdikpen polıtsııa qyzmetkerleri Atyraý qalasynyń 28 jastaǵy turǵynyn anyqtap, ýaqytsha ustaý ızolıatoryna qamady. Aldyn ala málimetter boıynsha, kúdikti men marqum áıel buryn tanys bolǵan. Aralarynda týyndaǵan janjal barysynda er adam áıelge pyshaq jaraqatyn salǵan. Alǵan jaraqattarynan áıel oqıǵa ornynda kóz jumdy. Qazirgi ýaqytta oqıǵanyń barlyq mán-jaıyn anyqtaýǵa baǵyttalǵan qajetti tergeý áreketteri júrgizilýde. Qylmystyń sebepteri anyqtalýda. Tergeý barysy oblystyq Polıtsııa departamenti basshylyǵynyń baqylaýynda.
Qazaqstan Respýblıkasy Qylmystyq-protsestik kodeksiniń 201-babyna sáıkes, ózge aqparat jarııa etilmeıdi, — dedi Aqtóbe oblysy PD bastyǵynyń birinshi orynbasary Serik Shalharov.
Buǵan deıin habarlaǵanymyzdaı, Oralda er adamdy pyshaqtap óltirgen kúdikti ustaldy. Qalasyndaǵy K.Tsıolkovskıı kóshesinde ornalasqan úılerdiń biriniń mańynan zorlyq-zombylyq belgileri bar er adamnyń máıiti tabyldy.
