Aqtóbede kópqabatty úı turǵyndary tońyp otyr
AQTÓBE. KAZINFORM – Aqtóbe qalasy Eset batyr turǵyn alabynda kópqabatty úı turǵyndary tońyp otyr. Olar jylytý maýsymy bastalǵaly beri jylý batareıalarynyń ysymaǵanyn aıtyp, shaǵymdandy.
Eset batyr turǵyn alabyndaǵy №21 úıdiń turǵyndary jańa jylytý maýsymynda tońyp otyrǵanyn aıtyp, jınaldy. Olardyń biri úı ishinde qalyń kıinip júretinin jetkizse, keıbiri balkon esigin qymtap qoıǵan, plastıkalyq tereze rezeńkesin aýystyryp, jylý batareıalarynyń aýasyn da ýaqytyly shyǵarǵan. Tipti jylý berý mekemesin shaqyrtyp, tekserýdi talap etken.
- Úıde kishkentaı balam bar. Qazir aýyryp júr. Bul másele týraly aıtqan kezde kórsetip, túsindiredi. Biraq olar bizdiń emes, ózgelerdiń jylý qubyryndaǵy jaǵdaıdy qarap, ólshep, kórsetip júr eken. Keıin páter ishiniń salqyn bolǵanyn ózimizden kórdi. Balkondy qysqa daıyndap, tereze rezeńkeleri de aýystyryldy,- dedi kópqabatty úı turǵyny Aqjarqyn Týrabaeva.
Eset batyr turǵyn alabyndaǵy 9 qabatty úı 2013 jyly paıdalanýǵa berilgen. Bul úıler kezekte turǵan kópbalaly, az qamtylǵan otbasylar men múgedektigi bar adamdarǵa, memlekettik qyzmetkerler qonystanǵan. Qazir de solar turady.
- Úımiz salqyn. Ystyq sýdyń ornyna qanjylym sý aǵady. Tipti sol jyly sýdy ysytyp, ydys jýyp jatyr keıde. Jylytý maýsymy bastalǵaly osyndaı. Batareıalar ysymaıdy, tek jyly ǵana. Ózimniń jasym 60-qa keldi. Zeınetaqymyzdy osyǵan berip otyrmyz,- dedi Bókenbaı Saǵyndyqov.
Aqtóbe qalasy ákiminiń baspasóz qyzmetiniń habarlaýynsha, bul úıge «Adal qyzmet» úı basqarýshy mekemesi qyzmet kórsetedi. Shaǵym aıtylǵan soń qaıta tekserip, retteý jumysy júrgizildi.
- Podezdi qarap shyqty. Birinshi elevatordaǵy nasos jylýdy kóbirek alyp ketken. Sony rettep, qaıta qalpyna keltirdik. Qazir jylý kóterilip jatyr. Ol meniń kinám emes, tehnıka, - dedi «Adal qyzmet» úı basqarýshy mekemesiniń basshysy Dáýlet Nurlanov.
Aıta keteıik, Aqtóbe qalasynda 1800-den astam kópqabatty úı bar. Onyń 1500-den astamynda ortalyqtandyrylǵan jylý júıesine qosylǵan.
Eske salsaq, Aqtóbe qalasy Eset batyr turǵyn alabynyń turǵyndary buǵan deıin jylýdy ár sharshy metrine tóleýge qarsy boldy.