Aqtóbede kópbalaly otbasy balalaryna 180 oqý granty beriledi

AQTÓBE. QazAqparat - Aqtóbede oblys ákiminiń 100 granty men Ulttyq qor esebinen 180 oqý granty beriletin boldy, dep habarlaıdy QazAqparat tilshisi.

Búgin oqý grantyn bólý komıssııasynyń otyrysy ótti. Jıynǵa komıssııa múshelerinen ózge densaýlyq, bilim, aýyl sharýashylyǵy, dene shynyqtyrý jáne sport, din isteri, mádenıet, arhıvter jáne qujattama basqarmasynyń basshylary qatysty. Basqosýda oblys ákimi Ońdasyn Orazalınniń óńirdegi suranysqa ıe mamandyqtarǵa arnaıy bólgen 100 grantyna JOO irikteldi. Grantty jeńip alýǵa jergilikti JOO-lardan bólek Astana, Almaty, Atyraý, Oral qalalarynyń onnan astam oqý orny qatysqan. Búgin memlekettik grantty ıelene almaı qalǵar jastar úshin oblys ákiminiń arnaıy bólgen 100 granty úlken múmkindik bolyp otyr.

«Maqsatymyz - oblysta suranysqa ıe mamandardy ázirlep, jastardyń sapaly bilim alýyna jol ashý. Olar bolashaqta óńir damýyna óz úlesin qosady dep senemin», - dedi Ońdasyn Orazalın.
Komıssııa otyrysynyń sheshimimen oblys ákiminiń 100 granty S. Seıfýllın atyndaǵy qazaq agrotehnıkalyq ýnıversıteti, Jáńgir han atyndaǵy Batys Qazaqstan agrarlyq-tehnologııalyq ýnıversıteti, Q. Jubanov atyndaǵy Aqtóbe memlekettik óńirlik ýnıversıteti, Nur-Múbarak Egıpet ıslam mádenıeti ýnıversıtetterinde bilim alatyn jastarǵa berildi.

«Óńirde orys tili men ádebıeti, matematıka-fızıka, veterınarııa, aýyl sharýashylyǵy mamandaryna suranys joǵary. Komıssııa atalǵan JOO-lardy birneshe sharttar boıynsha tańdady. Jataqhanamen qamtý, bilim sapasy, talapkerlerge qolaılylyǵy syndy 12 shart eskerildi. Sonymen qatar, Qazaqstan Respýblıkasynyń Ulttyq qorynyń nysanaly transfert esebinen 180 grant boıynsha baıqaýǵa túsken JOO-lar da irikteldi. 180 grant memleketten ataýly áleýmettik kómek alýshy jáne kópbalaly otbasynyń balalaryna arnalǵan. Olardyń attestattaǵy baǵasy men UBT-dan jınaǵan baly eskeriledi. Talapkerlerge memlekettik bilim grantyn taǵaıyndaý tamyzdyń 15 – 20 aralyǵynda ótkiziledi», - dep habarlady oblys ákiminiń baspasóz qyzmeti.