Aqtóbede kópbalaly analar men «Altyn alqa» ıegerleri marapattaldy
AQTÓBE. KAZINFORM – Aqtóbe qalasynda Analar kúnine oraı «Anaǵa taǵzym» atty saltanatty is-shara keń kólemde toılandy. Kóktemniń eń jyly, janǵa jaıly merekeleriniń birine aınalǵan bul kún Qazaqstanda jyl saıyn mamyr aıynyń ekinshi jeksenbisinde atap ótiledi, bıyl ol 10 mamyrǵa tuspa-tus kelip otyr.
Merekege arnalǵan saltanatty shara aqjaýlyqty analardy qarsy alý rásimimen bastaldy. Trıatlon parkiniń bas sahnasyna qaraı 100 qart ana, 100 «Altyn alqa» ıegeri jáne 100 «Kúmis alqa» ıegeri bet aldy. Olardy eki jaqtan sap túzep turǵan 100 qyz ben 100 jigit qurmetpen qarsy aldy.
Kóp uzamaı saıabaq kópbalaly analar, jas kelinder, shyǵarmashylyq zııaly qaýym men jastardy qosa alǵanda, osy erekshe kúndi atap ótýge kelgen qalanyń júzdegen turǵynyna toldy. Іs-shara ótkizilgen alań ulttyq naqyshta bezendirilip, erekshe atmosfera ornatty. Qonaqtar ana týraly áýezdi ánderdi tyńdap, túrli shyǵarmashylyq ujymdardyń óner kórsetýin tamashalady, taqyryptyq fotoaımaqtarda estelik sýretterge túsip, qoldanbaly óner kórmelerimen tanysyp, jyly otbasylyq atmosferaǵa endi.
Jınalǵandardy qala ákimi Azamat Beket quttyqtady. Ol analardyń berik otbasylyq baılanystardy qalyptastyrýdaǵy, bolashaq urpaqty tárbıeleýdegi jáne qoǵamnyń jan-jaqty damýyndaǵy baǵa jetpes rólin erekshe atap ótti.
Saltanatty sharanyń erekshe bóligi bala tárbıesine qosqan eleýli úlesi úshin marapattalǵan áıelderdi quttyqtaý rásimi boldy. Kópbalaly analarǵa, eńbek sińirgen pedagogtarǵa, densaýlyq saqtaý qyzmetkerlerine jáne halyqaralyq arenalarda, sondaı-aq zııatkerlik, sporttyq jáne shyǵarmashylyq baıqaýlarda ózderin kórsete bilgen daryndy balalardy tárbıelep otyrǵan analarǵa Alǵys hattar men baǵaly syılyqtar tabystaldy.
Іs-shara aıasynda uıymdastyrylǵan kórmede memlekettik grant ıegerleri - kásipker áıelder óz taýarlary men avtorlyq jumystaryn usyndy. Aıta ketý kerek, 2025 jyly 400 AEK mólsherindegi memlekettik qaıtarymsyz grantty 187 adam alǵan, onyń ishinde 156-sy – óz isin ashýǵa umtylǵan kópbalaly, jumyssyz jáne áleýmettik az qamtylǵandar sanatyndaǵy áıelder. Memlekettik qoldaýdyń arqasynda olar ózderiniń otbasylyq bıznesterin ashyp, tabysty damyta aldy.
Kásipker Aqmereı Jomart óz isiniń damýy týraly aıtyp berdi. Alǵan grant oǵan qajetti jabdyqtardy – pesh, frıtıýrnıtsa, ústelderdi satyp alyp, shaǵyn óndiris tsehyn ashýǵa múmkindik bergen. Qazirgi tańda onyń komandasynda 8 áıel jumys isteıdi.
Olar saltanatty sharalarǵa arnalǵan taǵamdardy daıyndaýǵa, merekelik dastarqandy bezendirýge jáne tamaq jetkizýdi uıymdastyrýǵa mamandanǵan.
– Bizdiń jobamyz eki jyldan beri tabysty damyp keledi jáne biz múmkindikterimizdi únemi keńeıtip otyramyz, - dedi Aqmereı.
Sol kórmede kópbalaly ana Janat Aqbalına da óziniń erekshe týyndylaryn usyndy. 2023 jyly «Bıznes bastaý» kýrstarynda oqyp, memlekettik grant túrinde qoldaý alǵan ol qolóner kásibimen belsendi aınalysa bastady. Onyń qolynan biregeı gobelender, sýretter, epoksıdti shaıyrdan jasalǵan buıymdar men sándik saǵattar shyǵady.
