Aqtóbede kóne qysh ydystarynan tary tuqymynyń izi tabyldy
AQTÓBE. KAZINFORM – Qysh ydystar shamamen 2 500 jyl buryn jasalǵan. Bul derek ejelgi dáýirde Aqtóbe óńirinde tary ósirilip, paıdalanylǵan bolýy múmkin ekenin kórsetedi.
Aqtóbe oblystyq tarıhı-ólketaný mýzeıinde ataqty taryshy Shyǵanaq Bersıevtiń týǵanyna 145 jyl tolýyna oraı «Aq tarynyń aqtańgeri» taqyrybynda jyljymaly kórme jasaqtaldy. Sonyń ishinde kóne qysh ydystary da zertteldi.
- Aqtóbe oblystyq tarıhı-ólketaný mýzeıiniń qorynda saqtalǵan kóne qysh ydystardy zertteý barysynda ǵalymdar tary tuqymdarynyń izderin anyqtady. Zertteý nysany bolǵan qysh ydys shamamen 2 500 jyl buryn jasalǵan. Arheologııalyq olja Aqtóbe oblysy Áıteke bı aýdanyndaǵy Atpa qorymynan tabylǵan. Atalǵan qorym 1986 jyly Aqtóbe oblystyq tarıhı-ólketaný mýzeıi men Aqtóbe pedagogıkalyq ınstıtýtynyń birlesken arheologııalyq ekspedıtsııasy tarapynan zerttelgen. Qysh ydystan tary izderiniń anyqtalýy Aqtóbe óńirinde ejelgi dáýirde tarynyń ósirilip, paıdalanylǵan bolýy múmkin ekenin kórsetedi. Bul derek óńirdegi eginshilik dástúri men ejelgi turǵyndardyń sharýashylyǵyn zertteýde mańyzdy. Zertteý jumystary ǵylymı yntymaqtastyq týraly memorandým aıasynda júrgizildi. Zertteýge Japonııanyń Meıdzı ýnıversıtetiniń jetekshi ǵylymı qyzmetkeri Endo Eıko men Á.H. Marǵulan atyndaǵy Arheologııa ınstıtýtynyń Arheologııalyq tehnologııalar zerthanasynyń aǵa ǵylymı qyzmetkeri Janargúl Qalıeva qatysty,- dep habarlady Aqtóbe oblystyq tarıhı-ólketaný mýzeıi.
Bul zertteý jumysy týraly qorytyndy áli tolyq shyqpady. Degenmen mýzeı qyzmetkerleri bul Aqtóbe óńiriniń kóne tarıhyn tereńirek zerdeleýge taǵy bir sebep dep otyr.
- Tary – Eýrazııa halyqtary ejelden paıdalanǵan mádenı daqyldardyń biri. Onyń qurǵaqshylyqqa tózimdiligi men qysqa merzimde pisip-jetilýi dala jaǵdaıynda ósirýge qolaıly bolǵan. Zertteý nátıjeleri Aqtóbe óńiriniń kóne tarıhyn tereńirek zerdeleýge jáne ejelgi turǵyndardyń eginshilikpen aınalysý erekshelikterin tanýǵa múmkindik beredi,- dep málimdedi Aqtóbe oblystyq tarıhı-ólketaný mýzeıi.
Buǵan deıin aq tarynyń atasy Shyǵanaq Bersıevtiń maıdan dalasyna qalaı kómekteskeni týraly jazǵan bolatynbyz.
