Aqtóbede kommýnaldyq qyzmettiń barlyq túri qymbattady
Aqtóbe oblysynda qańtardan bastap kommýnaldyq qyzmettiń barlyǵy qymbattady. Tabıǵı monopolııalardy retteý jáne básekelestikti qorǵaý komıtetiniń oblystyq departamenti taratqan málimetke súıensek, baǵa 2016-2020 jyldarǵa arnalǵan josparǵa sáıkes kóterildi. Degenmen elektr toǵy men gaz baǵasy qarastyrylǵan kezde kásipkerlerge basymdyq berilip, olardyń bıznesi úshin jeńildikter jasaldy.
«Qańtar aıynda sýyq sý 3 paıyzǵa qymbattady. Turǵyndar úshin QQS eseptemegende 2 teńge 13 tıyn qosylady. Al ózge tutynýshylar úshin 9 teńge 7 tıynǵa ósti. Káriz júıesiniń baǵasy 7,3 paıyzǵa kóterildi. Turǵyndar úshin 4,35 teńge, al ózge tutynýshylar úshin 22,24 teńge qosyldy. Al jylý men ystyq sý baǵasy turǵyndar úshin 10 paıyzǵa ósti. Jaryq taratýshylar da baǵany kóterip otyr. Olar tutynýshylar úshin tarıfti 10 paıyzǵa arttyrdy. Ózge tutynýshylar úshin 15 paıyzǵa arttyrý usynyldy. Biraq ákimdik pen elektr stantsııasy arasyndaǵy memorandýmǵa sáıkes kommýnaldyq qyzmet 10,7 paıyzǵa kóteriletin boldy. Aqtóbede gaz da qymbattady. Turǵyndar úshin 8 paıyzǵa ósip otyr», - dedi Tabıǵı monopolııalardy retteý jáne básekelestikti qorǵaý komıtetiniń oblystyq departament basshysynyń orynbasary Nurlan Bolatbaev.
Aıta keteıik, monopolııaǵa qarsy kúres qyzmetkerleriniń aıtýynsha, gaz baǵasy ózge tutynýshylar úshin 4 paıyzǵa ǵana qymbattady. Bul bıznesti qoldaýǵa baǵyttalǵan jumys.
