Aqtóbede kommertsııalyq uıym ókilinen para alǵan departament basshysynyń mindetin atqarýshy sottaldy

ASTANA. KAZINFORM – Aqtóbe qalalyq sanıtarlyq-epıdemıologııalyq baqylaý departamenti basshysynyń mindetin ýaqytsha atqarýshy sottaldy.

QR Sybaılas jemqorlyqqa qarsy is-qımyl agenttigi baspasóz qyzmetiniń habarlaýynsha, Aqtóbe qalasynyń № 2 soty oblystyq sanıtarlyq-epıdemıologııalyq baqylaý departamenti basshysynyń mindetin ýaqytsha atqarýshy B. Shaǵalbaevqa jáne onyń orynbasary N. Dosjanovqa qatysty úkim shyǵardy.

Olar bıylǵy 28 qańtarda dezınfektsııa, dezınsektsııa jáne deratızatsııa qyzmetterin júzege asyrýǵa lıtsenzııany kedergisiz bergeni úshin kommertsııalyq uıym basshysynan 1 mln teńge kóleminde para alǵany anyqtaldy.

Sot laýazymdy tulǵalardy para alǵany úshin, al kásipkerdi para bergeni úshin kináli dep taýyp, olarǵa memlekettik qyzmette, sýdıada jáne jergilikti ózin-ózi basqarý organdarynda qyzmet atqarý quqyǵynan ómir boıyna aıyra otyryp, 20-dan 35 mln teńgege deıingi mólsherde aıyppul túrinde jaza taǵaıyndady.

Sot aktisi zańdy kúshine engen joq.

Konstıtýtsııanyń 77-baby 3-tarmaǵynyń 1-tarmaqshasyna jáne qylmystyq-protsestik kodekstiń 19-baby 1-bóligine sáıkes qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árqaısysy kinásiz dep esepteledi.

- Memleket basshysynyń tapsyrmasyn oryndaý maqsatynda Sybaılas jemqorlyqqa qarsy is-qımyl agenttigi qoǵamda zańdylyq pen tártip qaǵıdatyn qamtamasyz etý, sondaı-aq sybaılas jemqorlyq faktileriniń jolyn kesý jónindegi jumysty jalǵastyrýda, -delingen habarlamada.

Osyǵan deıin Qazaqstannyń TMD elderimen sybaılas jemqorlyqqa qarsy is-qımyl týraly kelisimdi ratıfıkatsııalaǵany týraly jazdyq.