Aqtóbede kómirdiń baǵasyn sharyqtatqandardy tekserip jatyr
AQTÓBE. QazAqparat - Aqtóbede kómir baǵasy ózara kelisimmen qymbattaýy múmkin degen kúdikpen tekserilip jatyr. Aqtóbe oblystyq tabıǵı monopolııalardy retteý jáne básekelestikti qorǵaý departamenti úsh tasymaldaýshy usynǵan baǵany saraptaıdy, dep habarlaıdy QazAqparat tilshisi.
Elimizde kómir tapshylyǵy sezilip, baǵa kúrt ósti. Aqtóbe oblysynyń ákimi Berdibek Saparbaev qysqa daıyndyqty tekserip, kómir jetkizý, satý, áleýmettik nysandar men oblys turǵyndaryn qatty otynmen qamtamasyz etý jumysyn qarap shyqty. Buǵan deıin habarlaǵanymyzdaı, óńir basshysy Berdibek Saparbaev ár tonnnasyn 9-10 myń teńgege satyp alyp, 15-16 myńgege satý kezinde baǵany kim belgileıtinin surady . Keıin Aqtóbe oblystyq tabıǵı monopolııalardy retteý jáne básekelestikti qorǵaý departamenti tekserýdi bastady.
«Aqtóbe oblysy boıynsha úsh tasymaldaýshy kompanııa tekserilip jatyr. Departament suranys jiberip, baǵa týraly jan-jaqty aqparat jınaıdy, keıin saraptaıdy. Olar baǵany ózara aqyldasyp, kelisip kótergen bolýy múmkin. Kómir tasymaldap, satatyn taǵy birneshe kompanııa anyqtaldy. Olar da tekseriledi»,- dedi Aqtóbe oblystyq tabıǵı monopolııalardy retteý jáne básekelestikti qorǵaý departamenti basshysynyń orynbasary Saǵyndyq Erǵalıev.
Aqtóbe oblysynyń basym bóligi kógildir otyn paıdalanady. Biraq shalǵaı aýyldar úshin kómir áli de qajet. «Baıǵanın aýdanynda kómirdiń ár tonnasy 17 myń teńgege satylyp jatyr. Aýdan ortalyǵynan aýyl turǵyndary alyp keledi. Ony tasymaldaý qosymsha shyǵyn. Qatty otyndy aýylǵa jetkizý úshin qosymsha 5-6 myń teńge qajet bolady»,- dedi aýyl turǵyny Sultanbek Molbaev.
Aıta keteıik, Aqtóbe oblystyq tabıǵı monopolııalardy retteý jáne básekelestikti qorǵaý departamenti kartop baǵasynyń ósý sebebin anyqtap jatyr. Sebebi Aqtóbede kartop baǵasy kelisine 110-120 teńgemen satylýda.
