Aqtóbede kólik keptelisi bolatyn halyqaralyq baǵytta aınalma jol daıyndalyp jatyr

AQTÓBE. KAZINFORM – Samara-Shymkent baǵytyndaǵy Hromtaý-Qarabutaq bóligine aınalma jol daıyndalyp jatyr. Bul jolda jyl saıyn júk kólikteri turyp qalady.

Aqtóbe oblysyndaǵy halyqaralyq, respýblıkalyq tasjoldardy qysta kútip ustaýdy merdigerler men «QazAvtoJol» UK» AQ Aqtóbe oblystyq fılıaly júzege asyryp jatyr. Qazirgi kezde «Aqtóbe-Astrahan» jáne «Samara-Shymkent» joldarynyń bir bóligin eki merdiger óz mindetine aldy. Joldardaǵy qardy jınaý úshin olar 31 tehnıka bóldi. Sondaı-aq 1700 tonna qum jáne kóktaıǵaqqa qarsy 300 tonna qospa daıyndalǵan. Qazirgi kezde «QazAvtoJol» UK» AQ Aqtóbe oblystyq fılıaly115 tehnıkany jalǵa alǵan. Qosymsha taǵy 34 tehnıka tartylady. 

- Oblystaǵy respýblıkalyq mańyzy bar avtojoldardaǵy qar basatyn ýchaske uzyndyǵy - 246 shaqyrym. Bul oryndarda uzyndyǵy 86 shaqyrym bolatyn temirbeton qorshaýlar ornatylǵan. Qalǵan ýchaskelerde ýaqytsha aǵash qalqandar qoıylady jáne qar tazalaý jumystary júrgiziledi. «Aqtóbe-Hromtaý-Qarabutaq» ýchaskesindegi jol qozǵalysynyń qarqynyn eskere otyryp, qysqy kezeńde keptelisterdi boldyrmaý úshin Hromtaý jáne Qarabutaq aýyldarynda 34 shaqyrymdyq aınalma jol daıyndalyp jatyr. «Samara-Shymkent» avtojolynyń 844-863 shaqyrymy aralyǵynda uzyndyǵy 23 km bolatyn úsh aınalma jol qarastyrylǵan. Dál osy joldyń 963-966 jáne 983-985 shaqyrymy aralyǵynda, ıaǵnı, Áıteke bı aýdany terrıtorııasynda uzyndyǵy 11 shaqyrymdy quraıtyn taǵy bir qosymsha aınalma jol salyndy», - dedi «QazAvtoJol» UK» AQ Aqtóbe oblystyq fılıalynyń dırektory Aıbol Danaǵul.

Al jergilikti mańyzy bar joldarǵa 43 merdiger jaýapty. Oblys ákimi baspasóz qyzmetiniń habarlaýynsha, joldardaǵy qardy jınaýǵa 401 tehnıka jumyldyryldy. Barlyǵy 5,4 myń tonna ınertti materıal, 2,8 myń tonna dızel otyny ázirlendi. 

Eske salsaq, bıyl aqpanda kún boran bolyp, júzdegen kólik «Samara-Shymkent» tasjolynda turyp qaldy.