Aqtóbede kólikterdiń qysqa daıyndyǵy tekserildi

Bıyl qys erte túsip, qar kúreý jumystary bir aı buryn bastalýy múmkin. Úzdiksiz kólik qozǵalysyn qamtamasyz etý úshin tehnıkalardyń daıyndyǵy pysyqtaldy. Kommýnaldyq mekemelerde qazir 260 tehnıka bar. Onyń ishinde qum sebebin, qar sypyratyn, kúreıtin, tıep, túsiretin arnaıy kólikter jınaqtalǵan. Barlyǵy 15 kásiporyn qys boıy kóshe tazalyǵyn qamtamasyz etedi. qatysady.

«Bıyl qar qalyń bolady jáne qys uzaqqa sozylady dep boljanýda. Eger ótken jyldarda joldar men kóshelerdi qardan tazartý jumystary jeltoqsan bastalsa, bıyl qarasha qolǵa alynady. Sondyqtan aldyn-ala daıyndalýymyz qajet. Bul máselege nemquraıly qaramaý kerek. Ótken jyly qar shyǵarýdy avtomatty esepke alýdy engizý bastaldy. Endi barlyǵy eskeriledi, ár mashınada qurylǵylar ornatylǵan. Eger10 tonna qar shyǵarylsa, soǵan saı tıisti tólemderin alyp otyrady. Jumys kólemin asyrý nemese aldaý bolmaıdy. Bizdiń tarapymyzdan qarjylandyrýǵa baılanysty másele joq»,- dedi oblys ákimi Berdibek Saparbaev. Aqtóbe oblysy ákiminiń baspasóz qyzmetiniń habarlaýynsha, bıyl qar tazalaý jumystaryna 49 arnaıy kólik satyp alyndy. Jyl sonyna deıin taǵy 27 kólik satyp alady. Aqtóbe oblysynyń ákimi Berdibek Saparbaev keıin kómir saqtaý qoımalaryna baryp, otyndy jetkizý, satý, áleýmettik nysandar jáne oblys turǵyndaryn qamtamasyz etý jumysymen tanysty. «Ózińiz tonnasyn 9-10 myń teńgege satyp alyp, halyqqa 15-16 myń teńgege satasyz. Bul soma qaıdan paıda boldy? Nelikten osyndaı joǵary baǵa qoıǵansyz? Sizde munshalyq shyǵyn joq», - dedi oblys ákimi B.Saparbaev. Qazirgi kúni kómir qoımalarynyń materıaldyq-tehnıkalyq bazasy eskirgen, órt qaýipsizdigi saqtalmaǵan. «Segiz jyl boıy órt pen tehnıkalyq qaýipsizdik erejelerine saı kómirdi saqtaıtyn qarapaıym baza sala almapsyzdar. Munda jabyq qoıma, tıegishter bolýy tıis, vagondardyń júgi avtomatty túrde túsirilýi kerek», - dep atap ótti B.Saparbaev.

Aldaǵy ýaqytta kómir jetkizip, tasymaldaýmen aınalysatyn kompanııalardyń jumysy memlekettik organdardyń baqylaýynda bolady.