Aqtóbede kólikterdi alyp-satý shemasy boıynsha qarjy pıramıdasy anyqtaldy

AQTÓBE. QazAqparat – Aqtóbede avtokólikterdi alyp-satý shemasy boıynsha qarjylyq pıramıda uıymdastyrǵan. Bul týraly QazAqparat Qarjylyq monıtorıng agenttigine silteme jasap habarlaıdy.

Salymshylardyń kóligin bólip tóleý arqyly, naryqtaǵy baǵadan qymbatqa satyp alyp, úshinshi tulǵalarǵa arzanyraq satqan.

Atalǵan qylmysty QMA Aqtóbe oblysy boıynsha departamentiniń qyzmetkerleri óńirlik prokýratýramen jáne UQKD-men birlesip, Astana qalasy boıynsha ekonomıkalyq tergep-tekserý departamentiniń kómegimen anyqtady.

«Auto Seller» JShS lombard keıpindegi qarjylyq pıramıda Aqtóbe oblysynyń aýmaǵynda 2022 jylǵy naýryz aıynan bastap jumys jasaǵan. Materıaldyq zalal somasy 300 mln teńgeden asady. Lombard qyzmetkerleri avtokólik ıelerine (tirkeý esebine qaramastan) kólikterin joǵary baǵamen satyp alýdy usynǵan. Notarıaldy kýálandyrylmaǵan, resmı tirkelmegen, bólip tóleýdi kózdeıtin, satyp alý-satý sharttaryn jasasqan. Sodan keıin kólikter úshinshi tulǵalarǵa tómen baǵamen satyldy, al túsken aqsha óz múlkin satqysy keletin kelesi salymshylarǵa tólendi. «Auto Seller» JShS zańdy meken-jaıy boıynsha tintý barysynda tehnıka, zańsyz qyzmetke qatysty qujattama, dinı sıpattaǵy ádebıetter jáne bank kartalary tárkilendi», - delingen habarlamada.

Sot sheshimi boıynsha kúdiktiler eki aı merzimge qamaýǵa alyndy.