Aqtóbede kólikpen gaz tsısternasyna soǵylǵan kásipkerge qatysty qylmystyq is qozǵaldy
AQTÓBE. QazAqparat - Aqtóbelik kásipker kóligimen gaz quıý beketindegi tsısternaǵa soǵyldy. Qazir osy derek boıynsha eki qylmystyq is qozǵaldy, dep habarlaıdy QazAqparat tilshisi.
«Gaz quıý stantsııasyndaǵy tsısternaǵa kólik soǵylyp, osy derek boıynsha qylmystyq is tirkeldi. Zardap shekken adam aýrýhanaǵa tústi», - dep aqparat taratty Aqtóbe oblystyq Іshki ister bóliminiń baspasóz qyzmeti.
Belgili bolǵany, kásipker kóligimen tsısternaǵa soǵylyp, óz-ózine qol jumsamaq bolǵan. Abyroı bolǵanda gazǵa baryp soǵylǵan kólik jarylmady. Kólik ıesi sol kezde ózin pyshaqtaǵan. Kólik ıesi Aqtóbe oblystyq jedel járdem aýrýhanasyna jetkizildi. Naýqas emnen soń aýrýhanadan shyqqan. Al Aqtóbe oblystyq prokýratýrasy osy derek boıynsha eki qylmystyq is qozǵalǵanyn málimdedi.
«Kóligimen gaz tsısternasyna baryp soǵylǵan derekke qatysty tergeý jumystary júrip jatyr. Qylmystyq kodekstiń «Ózin-ózi óltirýge deıin jetkizý», «Bótenniń múlkin qasaqana joıý nemese búldirý» baptary boıynsha sot aldy tergeý jumystary júrip jatyr», - dedi Aqtóbe oblysy prokýratýrasynyń apparat jetekshisi Jasulan Dáýlembaev.
Aıta keteıik, oqıǵa 13 qazan kúni tańda tirkeldi.
