Aqtóbede kólik jýý ornynyń jumysshylary klıentteriniń kóligimen jol apatyna tústi
AQTÓBE. QazAqparat - Aqtóbede kólik jýatyn orynnyń eki jumysshysy klıentteriniń kólikterin ıeleriniń ruqsatynsyz minip shyǵyp, jaryspaqshy bolǵan. Jolda olar apat jasaǵan, dep habarlaıdy QazAqparat Polıtsııa departamentiniń baspasóz qyzmetine silteme jasap.
Oqıǵa 24 mamyrda saǵat 15-30-da bolǵan.
«Eki kólik jýýshy jigit ózderine tastap ketken «Toıota Kamrı» jáne «Hıýýndaı» kólikterimen ózara jarys uıymdastyrmaqshy bolǵan. Jarysqa shyǵa sala bir-birimen soqtyǵysyp qalǵan olar trassada kele jatqan «Vaz»markili kóligin de soǵyp ketken. Jol apatynyń saldarynan «Vaz» kóliginde otyrǵan kámeletke tolmaǵan jas oblystyq balalar aýrýhanasyna jetkizildi. Sonymen qatar kólik urlap jarysqa túskenderdiń biri Aqtóbe qalasynyń jedel medıtsınalyq járdem aýrýhanasyna tústi»,-dep habarlady departamenttiń baspasóz hatshysy Erbolat Sarqulov.
Atalǵan fakti boıynsha, polıtsııa qyzmetkerleri qajetti tergeý jumystaryn júrgizýde. Arnaıy saraptama taǵaıyndaldy. QR QK-niń 200 baby boıynsha is qozǵaldy.
Avtor: Samal Endibaeva
