Aqtóbede kólik joldan shyǵyp ketip, jolaýshysy kóz jumdy
AQTÓBE. QazAqparat – Aqtóbede joldan shyǵyp ketken kólik júrgizýshisi aýrýhanaǵa túsip, 34 jastaǵy jolaýshy qaza boldy, dep habarlaıdy QazAqparat tilshisi.
Aqtóbe – Atyraý tasjolynyń 258 shaqyrymynda kólik joldan shyǵyp ketti. Oqıǵa Baıǵanın aýdanynyń Qaraýylkeldi aýyly mańynda bolǵan. «Lada-Prıora» kóliginiń júrgizýshisi birden aýdandyq aýrýhanaǵa jetkizildi.
«Júrgizýshiniń birneshe jaraqaty bar. Oǵan ota jasaldy. Qazir jaǵaıy - turaqty, biraq aýyr. Jabyq bas-mı jaraqatyn alǵan, mıy shaıqalǵan, oń aıaǵy, oń jaq qabyrǵasy synǵan. Oǵan alǵashqy medıtsınalyq kómek kórsetilip, sanavıatsııa shaqyryldy. Naýqasqa travmatologogııalyq ota jasalýy qajet», - dedi Baıǵanın aýdandyq aýrýhanasynyń hırýrgi Azamat Adaev.
Aqtóbe oblystyq polıtsııa departamentiniń baspasóz qyzmetiniń habarlaýynsha, oqıǵa ornynda Baıǵanın aýdany, Jarly aýylynyń 34 jastaǵy turǵyny kóz jumdy.
«Іshimdik ishken-ishpegeni tekserilip jatyr. Sot-medıtsınalyq jáne tehnıkalyq saraptama taǵaıyndaldy», - dep habarlady oblystyq PD baspasóz qyzmeti.
