Aqtóbede kólik qozǵalysy qaıta jandandy
AQTÓBE. QazAqparat - Aqtóbe oblysynyń bas sanıtarııa dárigeriniń qaýlysy shyqty. Shekteý sharasy jeńildedi. Qoǵamdyq kólikter qozǵalysy qaıta jandandy, dep habarlaıdy QazAqparat tilshisi.
Aqtóbede áli de ujymdyq sharalardy, forýmdardy ótkizýge bolmaıdy. Sonymen birge karaoke, bılıard, kompıýterlik klýb, túngi klýb, boýlıng ortalyqtarynyń jumysy da toqtap tur. Balalardyń oıyn-saýyq ortalyqtary jabyq. Kınoteatr, býkmekerlik keńse jáne loto-klýbtar jumys istemeıdi. Balalardyń saýyqtyrý lagerleri, fýdkort, banket zaldarynyń qyzmeti, qalalyq jáne qoǵamdyq jaǵajaılar, ashyq akvaparkter, teatrlardyń, kontserttik zaldardyń jumysyna tyıym salynǵan.
«Demalys jáne mereke kúnderi saýda úıleri, saýda jelileri, saýda-oıyn-saýyq ortalyqtary, azyq-túlik emes jáne azyq-túlik satatyn jabyq bazarlar, sulýlyq salondary, shashtaraz, SPA ortalyqtary jáne kosmetologııalyq qyzmet jumys istemeıdi. Fıtnes jáne sporttyq-saýyqtyrý ortalyqtary, basseınder, sporttyq keshender, saýna, dinı obekti, ashyq aýadaǵy attraktsıondar qyzmeti toqtaıdy», - dep jazylǵan Qaýlyda.
Qaýlyǵa sáıkes saýda-oıyn saýyq ortalyqtary, saýda úıleri jumys kúnderi saǵat 10:00-den 20:00-ge deıin, ashyq aýadaǵy azyq-túlik jáne azyq-túlik emes bazarlar jumys jáne demalys kúnderi saǵat 10:00 - 18:00 aralyǵynda, jabyq azyq-túlik jáne azyq-túlik emes bazarlar jumys kúnderi saǵat 10:00-18:00 aralyǵynda, ashyq aýadaǵy aýyl sharýashylyq, mektep jáne azyq-túlik jármeńkeleri demalys kúnderi saǵat 09:00 – 18:00, sulýlyq salondarynyń, shashtaraz, SPA ortalyqtary jáne kosmetologııalyq qyzmet kórsetetin obektiler jumys kúnderi saǵat 10.00 – 20.00 aralyǵynda jumys isteıdi. Qoǵamdyq monshalar jumys jáne demalys kúnderi saǵat 08:00 – 22:00 aralyǵynda qyzmet kórsetedi. Kóshede azyq-túlik satýǵa ruqsaty bar kásipkerler 10:00 – 22:00 jumys isteıdi. Qalada qoǵamdyq kóliktiń jumys kúnderi shtattyq rejıminde, demalys jáne mereke kúnderin qosqanda saǵat 06:00-den 21:00-ge deıin júredi.