Aqtóbede kólik qaqqan velosıpedshi aýrýhanada kóz jumdy
AQTÓBE. QazAqparat – Aqtóbede jolda kólik qaǵyp ketken velosıpedshi aýrýhanada qaıtys boldy, dep habarlaıdy QazAqparat tilshisi.
Oqys oqıǵa Aqtóbe qalasynda bolǵan. «Opel Omega» avtokóliginiń 29 jastaǵy júrgizýshisi jolda velosıped júrgizýshisin qaǵyp ketken. Saldarynan 48 jastaǵy er adam túrli dene jaraqatyn alyp, Jedel medıtsınalyq járdem aýrýhanasynyń jansaqtaý bólimine jatqyzyldy.
«Dárigerler qoldan kelgenniń bárin jasady. Ókinishke qaraı, qutqarý múmkin bolmady. Atalǵan derek boıynsha QR QK 345-baby 2-bóligi boıynsha sotqa deıingi tergeý amaldary júrgizilip jatyr», - dep habarlady oblystyq PD baspasóz qyzmeti.
Aıta keteıik, jyl basynan beri velosıpedshilerdiń qatysýymen 5 jol-kólik oqıǵasy tirkeldi. Velosıped aıdaǵan 4 adam qaza boldy.
«Kóp jaǵdaılarda velosıpedshiler jol qozǵalys erejelerin buzǵan. Jaıaý júrginshiler jolynda velosıpedti aıdap ótýge bolmaıdy. Qarapaıym erejelerdi saqtaý adam ómirin saqtaıtynyn uǵynǵanymyz jón», - dedi oblystyq PD baspasóz qyzmeti.
