Aqtóbede kólik qaǵyp ketken qarııa aýrýhanada kóz jumdy
AQTÓBE. QazAqparat - Aqtóbede joldy kesip ótpek bolǵan 66 jastaǵy qarııa kóz jumdy, dep habarlaıdy QazAqparat tilshisi.
Aqtóbe qalasynda «Hyundai Elantra» avtokóliginiń júrgizýshisi 101-atqyshtar brıgadasy kóshesi men aǵaıyndy Jubanovtar kóshesiniń qıylysynda jaıaý júrginshini qaǵyp ketti. Rýlde 30 jastaǵy áıel boldy.
«Jol-kólik oqıǵasy saldarynan jaıaý júrginshi Jedel medıtsınalyq járdem aýrýhanasynyń jansaqtaý bólimine jatqyzylyp, birneshe saǵattan keıin qaza boldy. Atalǵan derek boıynsha Qylmystyq kodekstiń «Abaısyzda adam ólimine ákep soqqan JQE buzý» baby boıynsha sotqa deıingi tergeý júrgizilip jatyr»,- dedi oblystyq PD baspasóz qyzmetiniń jetekshisi Erbolat Sarqulov.
