Aqtóbede kólik ınspektoryna para usynǵan júrgizýshi isti boldy
AQTÓBE. QazAqparat – Máskeýden júk tasymaldaǵan qazaqstandyq júrgizýshi kólik ınspektoryna 5 myń teńge para usynǵan. Para berý deregi dereý tirkelip, is sotqa jiberildi, dep habarlaıdy QazAqparat tilshisi.
Oqıǵa Aqtóbe qalasynda tirkeldi. Túrkistan qalasynyń turǵyny Máskeý qalasynan energetıkalyq sýsyn men tez daıyndalatyn kespe ónimderin tasymaldap, ony kóliktik baqylaý ınspektsııasynyń qyzmetkerleri toqtatty. Tekserý kezinde júk kóligindegi tahograf jumys istemegen. Sol sátte júrgizýshi ákimshilik jaýaptan jaltaryp, ınspektorǵa 5 myń teńge kóleminde para bergen.
«Inspektsııa qyzmetkeri sybaılas jemqorlyqqa qarsy qyzmet ókilderine habar berdi. Derek boıynsha Qylmystyq kodekstiń 367-baby 1-bóligimen is qozǵaldy. Aqtóbe kólik prokýratýrasy qylmystyq isti zerdelep, aıyptaý aktisin daıyndady. Sot otyrysy kezinde prokýror sottalýshyǵa paranyń 15 eselengen mólsheri negizinde aıyppul salyp, belgili bir laýazymdy atqarý nemese belgili bir qyzmetpen aınalysý quqyǵynan ómir boıyna aıyrý túrindegi jaza taǵaıyndaýdy surady. Іsti qaraǵan sot prokýrordyń jaza taǵaıyndaý týraly usynysyn quptady. Sottalýshy belgili bir laýazymdy atqarý nemese belgili bir qyzmetpen aınalysý quqyǵynan ómir boıyna aıyryldy. Sonymen birge 75 myń teńge aıyppul tóledi. Sot úkimi kúshine endi. Búginde qylmystyq qýdalaý organdarynda laýazymdy tulǵalarǵa para berý deregi boıynsha ózge de qylmystyq isterge tergep-tekserý júrip jatyr. Laýazymdy tulǵalarǵa para berý qylmys ekendigin eskergen jón», - dep habarlady Aqtóbe kólik prokýratýrasynyń baspasóz qyzmeti.
