Aqtóbede kólik ınspektsııasy men polıtsııa avtobýstardy tekserýdi bastady
AQTÓBE. QazAqparat - Aqtóbede jolaýshylar tasymaldaıtyń avtobýstar tekseriledi. 22 qańtar men 18 aqpan aralyǵynda polıtsııa men kóliktik baqylaý ınspektsııasy birlese jumys isteıdi, dep habarlaıdy QazAqparat tilshisi.
Aqtóbe oblysynyń ákimi Berdibek Saparbaev jolaýshylar tasymaldaıtyn avtobýstardyń tehnıkalyq qujattaryn tekserip, jolda tártip ornatýdy tapsyrǵan bolatyn. Búgin Aqtóbe oblystyq kóliktik baqylaý ınspektsııasy men jol-kólik polıtsııasy tekserýdi bastady.
«Aqtóbe oblysynyń ákimi men kólik komıtetiniń nusqaýy boıynsha búgin tekserý bastaldy. Tekserý 18 aqpanǵa deıin jalǵasady. Jergilikti polıtsııa qyzmeti men kóliktik baqylaý ınspektsııasy «Avtobýs» jedel-aldyn alý sharasyn uıymdastyrdy. Tekserý júrgizetin ár mekeme avtobýstardyń qujattaryn qaraıdy. Inspektsııa sheteldik jolaýshylardy tasymaldaıtyn avtobýstardy baqylaýǵa alady», - dedi Aqtóbe oblystyq kóliktik baqylaý ınspektsııasy basshysynyń orynbasary Erulan Qurmanııazov.
Aıta keteıik, kóliktik baqylaý ınspektsııasy sheteldik jolaýshylardy tasymaldaýǵa ruqsat beretin qujatty qaraıdy.
«Kóliktik baqylaý ınspektsııasynyń eki beketi bar. Jyljymaly bekettiń biri Aqtóbe-Mártók tasjolynyń 96 shaqyrymynda ornalasqan, ekinshisi Aqtóbe qalasy mańyndaǵy Qurashasaı aýylynda tur. Biri Samara-Shymkent, biri «Batys Qytaı - Batys Eýropa» halyqaralyq dálizine qoıylǵan.
«Reıs aldynda júrgizýshi medıtsınalyq tekserýden ótedi. Al tehnıkalyq baqylaýdy avtovokzal tekserip, ruqsat beredi. Qazirgi kúni tasymaldaý eki túrge bólinedi: turaqty jáne turaqty emes. Aqtóbe oblysynda turaqty emes tasymaldaý túrimen 25 adam aınalysady. Bul tizimge týrısterdiń ótinishimen jetkizý, vahtalyq ádispen jumys isteıtin jumysshylar tasymaldaý kiredi. Eger tekserý nátıjesinde quqyqbuzýshylyq anyqtalsa, ákimshilik jaza qoldanylyp, aıyppul salynady», - dedi Erulan Qurmanııazov.
