Aqtóbede kólik aýdarylyp, júrgizýshi men jolaýshy mert boldy
AQTÓBE. QazAqparat - Samara-Shymkent tasjolynda kólikti basyp ozbaq bolǵan júrgizýshi rýlge ıe bola almaı, aýdaryldy. Saldarynan ózi men jolaýshy qaza tapty, dep habarlaıdy QazAqparat tilshisi.
Oqıǵa 2 qyrkúıek kúni saǵat 19:00-de boldy. «Chevrolet Aveo» markaly kólik rýlindegi júrgizýshi Hromtaý qalasynan Qarabutaq aýylyna baǵyp alyp, aldyndaǵy kólikti basyp ozbaq boldy. Sol kezde qarsy baǵytqa shyǵyp ketip, rýlge ıe bola almaı qaldy. 38 jastaǵy júrgizýshi kóligimen oń jaqqa aýdarylyp, saldarynan ózi jáne jolaýshy kóz jumdy.
«Sonymen birge úsh jolaýshy Hromtaý qalasynyń ortalyq aýrýhanasyna jatqyzyldy. Oqıǵa boıynsha «Jol qozǵalysy erejesin buzý» babyna sáıkes sotqa deıingi tergeý bastaldy.
Taldaýǵa súıensek, barlyq apattyń shamamen 40% qarama-qarsy jolaqqa shyǵý kezinde tirkeledi», -deıdi Aqtóbe oblysy PD bastyǵy Atyǵaı Arystanov.
