Aqtóbede kólik aýdarylyp, júrgizýshi kóz jumdy
AQTÓBE. QazAqparat – Aqtóbede jol-kólik oqıǵasy bolyp, 25 jastaǵy júrgizýshi kóz jumdy, dep habarlaıdy QazAqparat tilshisi.
Aqtóbe oblysy, Áıteke bı aýdany, Araltóbe aýyly mańynda jol-kólik oqıǵasy boldy. «LADA Priora» kóliginiń 25 jastaǵy júrgizýshisi T.Júrgenov aýyly jaǵynan Qarabutaq kenti baǵytynda qozǵalyp, joldyń oń jaq jıegine aýdarylyp ketken.
«Jol-kólik oqıǵasy saldarynan júrgizýshi alǵan jaraqattarynan oqıǵa ornynda kóz jumdy. Al 22 jastaǵy jolaýshy Áıteke bı aýdanynyń ortalyq aýdandyq aýrýhanasyna jatqyzyldy. Jol-kólik oqıǵasy deregi boıynsha Qylmystyq kodekstiń «Abaısyzda adam ólimine ákep soqqan jol qozǵalysy erejesin buzý» baby boıynsha sotqa deıingi tergeý bastaldy. Sot-medıtsınalyq jáne avtotehnıkalyq saraptamalar taǵaıyndady», - dedi oblystyq PD baspasóz qyzmetiniń jetekshisi Erbolat Sarqulov.
Eske salsaq, dál osy baǵyttaǵy tasjolda júk jáne jeńil kólik soqtyǵysyp, úsh adam kóz jumaǵan bolatyn.
