Aqtóbede kólik apatynan atasy men nemeresi kóz jumdy
AQTÓBE. QazAqparat - Aqtóbede kólik aýdarylyp, atasy men nemeresi kóz jumdy, dep habarlaıdy QazAqparat tilshisi.
«Oblystyq mańyzy bar «Pokrovka-Jańajol» avtojolynyń 30-shaqyrymynda VAZ-2114» markaly kólik aýdarylǵan. Jol-kólik oqıǵasy saldarynan avtokóliktiń 62 jastaǵy júrgizýshisi men onyń 15 jastaǵy nemeresi alǵan jaraqatynan oqıǵa ornynda kóz jumdy. Al 18 jastaǵy nemeresi Keńqııaq kentindegi aýrýhanaǵa jatqyzyldy»,- dep habarlady oblystyq PD baspasóz qyzmetiniń jetekshisi Erbolat Sarqulov.
Aıta keteıik, jyl basynan beri Aqtóbede 248 jol-kólik apaty boldy. Barlyǵy 39 adam kóz jumyp, 338 adam jaralyndy. Buǵan deıin habarlaǵanymyzdaı, jol-kólik apatynan eki mektep dırektory kóz jumyp, ekeýi aýrýhanaǵa tústi.