Aqtóbede kólik apatyna ushyraǵan balalardyń ata-analary talap-tilegin aıtty
Aqtóbe oblystyq balalar aýrýhanasynda em alyp jatqan balalardyń ata-analary birneshe tilegin aıtty.
«Qazir ata-analar balalarynyń amandyǵyn tilep otyr. Al negizi jarysqa barar kezde balalar avtobýspen tasymaldanýy kerek. Avtobýsqa polıtsııa ilesip júrýi kerek»,- dedi Murat Idegen.
Balalardyń bári Shubarqudyq aýylyndaǵy eki mektepte oqıdy. Olar buǵan deıin aýdanda ótken jarysta jeńip, iriktelgen.
«Balalardy aparýǵa qolhat bermedik. Jolaqyǵa aqsha almady. Osy joly aǵaıymyz tegin aparady dep máz bolyp shyqty. Oǵan deıin taksıge aqsha berip júrdik. Bir kólikke 11 adamdy tıep alǵany masqara jaǵdaı. Sonymen birge áleýmettik jelige jol apaty kezindegi vıdeo jarııalanyp ketti. Balalar úsip-tońyp jatyr jerde. Al adamdar túsirip, taratyp jibergen. Qanshama bala kórip, jylady. Kimniń dáti baryp, túsirgenin bilmeımin. Qyzyq kórgen sııaqty. Taksı júrgizýshisi dep oılaımyn túsirgen. Taýyp alyp, jazalanýyn talap etemiz»,- dedi ata-ana B. Karıbaeva.
Onyń aıtýynsha, jol apaty tańerteń bolǵanymen, ata-analarǵa habar túski mezgilde jetti.
Aıta keteıik, jol apaty bolǵan jerge úsh jerden jedel járdem jiberildi. Bolgarka aýylynan 30 mınýtta jetti. Keıin Qaraqobda men Aqaı aýyldarynan jedel járdem bardy. Arada 40-45 mınýttan soń oblys ortalyǵynan da arnaıy kólik bardy.
«Keshe keshkilik osy balalardyń ata-analarynyń tanystary, týystary habarlasyp, túrli aqparat berdi. Oblystyq bilim basqarmasy, oblystyq densaýlyq saqtaý basqarmasyna, sosyn aýdan ákimine habarlasyp mán-jaıdy anyqtadyq. Bir balanyń kóz jumyp, birneshe oqýshynyń aýrýhanaǵa túskenin bildim. Búgin birden kelip, ata-analarymen sóılestim. Qazir bári amandyǵyn tilep otyr. Depýtattar buǵan deıin tasymaldaý týraly aıtty. 2025 jylǵa deıin barlyq mektep avtobýspen qamtylady. Júıeli túrde atqarylatyn jumys», - dedi oblystyq máslıhattyń depýtaty Juldyz Qojabekova.
Jarys keshe №2 balalar-jasóspirimder sport mektebinde bastalǵan. Mektep ókilderiniń aıtýynsha, úsh oıynnan soń, ıaǵnı, túski mezgilde jarys toqtatylyp, komandalar taratyldy. Olar muny jol-kólik apatynyń bolýymen baılanystyrady.
