Aqtóbede kólik apatyna túsken jas jigittiń ákesi halyqtan kómek surady
AQTÓBE. QazAqparat - Aqtóbe qalasynyń turǵyny Serik Jantikenov kólik apatyna túsip, 1 aıdan astam ýaqyt boıy jansaqtaý bóliminde em qabyldady. Mıyna qan quıylǵan jigittiń ákesi aqtóbelikterden kómek surap otyr, dep habarlaıdy QazAqparat tilshisi.
Aqtóbe qalasyndaǵy jedel járdem aýrýhanasynda 37 kún boıy em qabyldaǵan Serik Jantikenovti 10 qyrkúıekte kólik qaǵyp ketken. Bas-mı jaraqatyn aldy, súıekteri syndy. Qazir jas jigit sóılemeıdi, júre almaıdy. Tósekke tańylǵan balasyn kórgen áke qandaı em kórseterin bilmeı otyr. Dárigerler tek ýaqtyly tamaǵyn berip, jaıly tósekke jatqyzý jaıly usynys bergen.
«Balamnyń qur súlderi qalǵan. Ol 37 kún boıy dárigerlerdiń baqylaýynda boldy, baıqaýymsha tamaqty da az bergen. Óz erkimen dáretke bara almaıdy, apparatqa tańylǵan. Kórip, jylap jiberdim. Buǵan deıin oblystyq jedel járdem aýrýhanasynyń neırohırýrgııa bóliminde em qabyldady. Biz onyń janynda bola almadyq. Alǵashqyda kóre almaı zar boldyq. Úsh kúnnen beri kútim bólimine jiberilip, anasy baqylaýyna aldy. Qazir dene qyzýy kóterilgen», - dedi Almaz Jantikenov. Ákesi balasyn qaıda aparyp, kimnen kómek suraryn bilmeı otyr. Úıine apara almaıdy. Sebebi, jasandy jolmen tamaqtandyrý qajet.
«Eki bólmeli páterde turamyn. Qaqyryq jınap, nájis quıatyn apparat 200 myń teńge turady. Kereýet te 400-500 myń teńge eken. Amalym taýsylǵan soń halyqtan kómek surap, 200 teńge bolsa da aqsha aýdarsa dep kútemin. Balam kózin ashady, biraq eshqandaı emotsııa joq. Júregim aýyrady, uıyqtaı almaı júrmin», - dedi kózine jas alǵan Almaz Jantikenov.
Jol-kólik apaty Aqtóbe qalasynyń ortalyǵynda boldy. Sol kezde Serik Jantikenov taksı kútip turǵan. Qazirgi kezde jol apaty tergelip jatyr. Al dárigerler es-tússiz túsken jas jigitke ota jasap, jansaqtaý bóliminen shyǵarǵanyn, tek ońaltý sharalaryn júrgizý qajet ekenin aıtyp otyr.
«Jol apatynda jaraqat alǵan Serik Jantikenov bir aıdan astam ýaqyt buryn jedel járdem aýrýhanasyna jetkizildi. Basyna zaqym kelgen, mıyna qan quıylǵan. Súıekteri syndy. Travmatıkalyq shokpen tústi. Esin bilmedi. Ony birden jansaqtaý bólimine qabyldap, ota jasaldy. Mıyna quıylǵan qandy aldy. Sodan beri bizde em qabyldady. Ol esin jıdy, taǵaıyndalǵan emdi qabyldady. Jaǵdaıy birqalypty. Biraq múgedek bolyp qaldy. Bizdiń maqsatymyz, tiri qaldyrý, ol tiri qaldy. Serik Jantikenov 37 kún jansaqtaý bóliminde jatty. Sońǵy 10-15 kúnde ol eshqandaı em qabyldaǵan emes. Sebebi, emin alyp boldy», - dedi Aqtóbe oblystyq jedel járdem aýrýhanasynyń bas dárigeri Arystan Raqymjan.
ıAǵnı, jas jigit endi sulq jatady. Dárigerler ony úıge, otbasy ortasyna alyp ketýge keńes berdi.
«Ýaqyt ótken saıyn densaýlyǵyn tekserip turady. Ol tek jatady. Aýrýhanada jatsyn dep otyr. Aýrýhana jedel kómek beredi. Úıine almaǵan soń biz «Meıirim» kútim bólmesine jiberdik. Eshkim dalaǵa qýyp shyqqan joq», - dedi R.Arystan.
