Aqtóbede kóligimen eki balanyń anasyn mert qylǵan vzvod komandıri sottaldy
AQTÓBE. QazAqparat - Aqtóbede joldy kesip ótpek bolǵan eki balanyń anasyn mert qylǵan 24 jastaǵy áskerı qyzmetkerge úkim shyqty, dep habarlaıdy QazAqparat tilshisi.
Eske salaıyq, 37 jastaǵy áıel 2017 jylǵy qarasha aıynda Aqtóbe-Orsk tasjolynda qaza boldy. Ol keshqurym jumysynan úıine qaıtyp bara jatqan. Avtojolda jóndeý jumystary júrgizilip jatqandyqtan, onda jol belgileri bolmaǵan. «Lexus ES 300» kóligin tizgindegen jas jigit oqıǵa ornynan qashyp ketip, keıin qaıta oralǵan.
Aqtóbe garnızonynyń áskerı soty Darhan Qabylqaıǵa qatysty qylmystyq iske úkim shyǵardy.
Іs materıalyna súıensek, Darhan Qabylqaı áli paıdalanýǵa berilmegen tasjolmen júrgen. Sot-medıtsınalyq saraptama kezinde jábirlenýshi áıel travmatıkalyq shoktan kóz jumǵany, birneshe jerinen dene jaraqatyn alǵany belgili boldy.
Sot otyrysy kezinde áskerı qyzmetker taǵylǵan aıypty moıyndap, keshirim surady. Ol adamdy qaǵyp ketkenin bile tura, kólikti toqtatpaı, júrip ketken. Keıin adamdardyń jınalǵanyn baıqap, jaıaý keri barǵan. Sot otyrysy kezinde jábirlenýshi tarap keshirim berdi. Ári keltirilgen materıaldyq-moraldyq shyǵyn tolyq ótelgenin aıtty.
Darhan Qabylqaı Qylmystyq kodekstiń «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy», «Jol-kólik oqıǵasy bolǵan jerden ketip qalý» baptary boıynsha aıypty dep tanylyp, oǵan túpkilikti túrde 2 jyl 6 aıǵa shartty túrde bas bostandyǵynan aıyrý jazasy taǵaıyndaldy. Sonymen qatar ol 2 jyl 6 aı kólik basqarý quqyǵynan aıyryldy. 30238 áskerı bóliminiń vzvod komandıri D.Qabylqaı «leıtenant» áskerı sheninen de aıyryldy.
Sot úkimi kúshine engen joq.
