Aqtóbede qoldan qarý jasaǵandar sottaldy
AQTÓBE. QazAqparat - Aqtóbede qoldan qarý jasap, paıda tapqan qylmystyq topqa úkim shyqty. Olar 3 jyldan 5 jylǵa deıin bas bostandyǵynan aıyryldy, dep habarlaıdy QazAqparat tilshisi.
Aqtóbe qalalyq sotynda Qylmystyq kodekstiń «Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý», «Qarýdy zańsyz jasaý», «Qarýdy, oq-dárilerdi, jarylǵysh zattar men jarylys qurylǵylaryn jymqyrý ne qorqytyp alý» baptary boıynsha qylmystyq is qaraldy.
Іs materıalyna súıensek, sottalýshy Ánýar Jolmaǵambetov ınternetten «Baıkal» markaly tapanshasynyń «MR-79-9TM» modelin qoldan jasaýdy úıretetin beınematerıaldy qaraıdy. Tehnıkalyq jaǵynan «Makarov» qarýyna uqsas tapansha jasaýǵa bolatynyn bilgen soń paıda tappaq bolady. Keıin sottalýshy A.Jolmaǵambetov «Baıkal» markaly qarýyn satatyn oryn men temir ustasyn izdeıdi. Ol «Mergen LTD» JShS-nyń qarý satatyn dúkeninde jumys isteıtin menedjer Nurlan Berdenovpen tanysady. Temir ustasy B.Qanatovty da tabady.
Usta arnaıy syzba boıynsha qarý-jaraq daıyndaýǵa qajetti bólshekterdi jasap beredi. Al qarý qaladaǵy garajdardyń birinde daıyndalady. Oq-dárini qarý satatyn dúkenniń menedjeri N.Berdenov tabady. Ol óziniń jumys ornyn paıdalanyp, qoımadan aldymen 640 dana oq alyp shyǵarady. Keıin ony A.Jolmaǵambetovke 128 myń teńgege satyp jibergen.
Tehnıkalyq negizdemesi «Makarov» tapanshasyna saı keletin qarý daıyndalǵan soń sottalýshy A.Jolmaǵambetov ony satý jolyn izdeıdi. Dál osy kezde Memlekettik kirister departamentiniń qyzmetkerleri zańsyz qarý satý deregin anyqtaıdy. Keıin «Sever» laqap atymen qarýdy satyp alatyn adamdy jiberip, 250 myń teńgege alady. Sóıtip gaz tapanshasynan atys qarýyn jasaǵan sottalýshy A.Jolmaǵambetovtyń qylmystyq isi áshkere bolady.
Aıta keteıik, sottalýshy A.Jolmaǵambetov qylmystyq isin jalǵastyryp, zańsyz qarý jasaý isine tanysy Rýslan Kýnısov, Muhambetııar Erenovti aralastyrady. Sottalýshy Muhambetııar Erenov qarýdy tanysy R.Mıhetovke satpaq bolady. Biraq ol qylmystyq is týraly Ulttyq qaýipsizdik komıtetiniń oblystyq departamentine habarlaıdy.
Sot otyrysy kezinde sottalýshylar aqshaǵa muqtaj bolǵan soń zańsyz qarý daıyndaǵandaryn aıtyp, óz isterine ókindi. Qarý dúkeniniń menedjeri N.Berdenov shyǵyndy tolyq ótep, qoımadan urlanǵan oq-dárilerdiń aqshasyn qaıtardy.
«Sottalýshy Ánýar Jolmaǵambetov Qylmystyq kodekstiń «Qarýdy zańsyz jasaý», «Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý» baptary boıynsha aıypty dep tanylyp, 5 jylǵa bas bostandyǵynan aıyrý jazasy taǵaıyndalsyn. Sottalýshy Nurlan Berdenov Qylmystyq kodekstiń «Qarýdy, oq-dárilerdi, jarylǵysh zattar men jarylys qurylǵylaryn jymqyrý ne qorqytyp alý», «Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý» baptary boıynsha aıypty dep tanylyp, 5 jylǵa bas bostandyǵynan aıyrý jazasy taǵaıyndalsyn»,- dedi sýdıa Erlan Baqytjan.
Sonymen qatar, sottalýshy Rýslan Kýnısov pen Muhambetııar Erenov 3 jylǵa bas bostandyǵynan aıyryldy.
Foto: rusargument.ru
