Aqtóbede Kókjıde qumyndaǵy jerasty jáne jerústi sýyna monıtorıng júrgiziledi

AQTÓBE. KAZINFORM – Aqtóbede «Kókjıde qumy» jerasty jáne jerústi sýlary sapasynyń monıtorıngine 97 mln teńge bólindi.

Aqtóbe oblystyq tabıǵı resrýstar jáne tabıǵatty paıdalanýdy retteý basqarmasy «Kókjıde qumyna» monıtorıng jasaý úshin Memlekettik satyp alý konkýrsyn ótkizdi. Konkýrsqa barlyǵy úsh kompanııa qatysyp, «Aqpan» JShS-i jeńimpaz atandy. Joba quny – 97 mln teńge. Tapsyrys berýshiniń talabyna súıensek, synamalar durys iriktelýi tıis. Zertteý kezinde merdiger kez kelgen nemese birneshe akkredıttelgen zerthanalarda taldaý júrgizýge quqyly. Synamalardy óńdeý ýaqyty zerthananyń múmkindigine baılanysty bolady, biraq kelisilgen merzimde qorytyndysy shyǵýy tıis. Kókjıde qumdy massıviniń jerasty jáne jerústi sýlarynyń sapasyna monıtorıngtik baqylaý júrgizýdiń negizgi maqsaty - tehnogendik lastanýyn anyqtaý jáne qorǵaý jónindegi usynymdardy ázirleý. Qujatta monıtorıngtik baqylaý qys, kóktem, jaz, kúzde júrgiziledi dep kórsetilgen.

Tekseriletin uǵymalar: 

- Qum massıvi shegindegi jer asty sýlarynyń memlekettik monıtorıngtik jelisiniń baqylaý pýnktterinde 20 uńǵyma;

- Oblystyq tabıǵı resýrstar jáne tabıǵatty paıdalanýdy retteý basqarmasynyń vedomstvolyq monıtorıngtik jelisinde 12 uńǵyma;

- Kókjıde ken ornynyń monıtorıngtik jeliside 38 uńǵyma;

- «SNPS-Aqtóbemunaıgaz» AQ-da 8 uńǵyma;

- «Fırma ADA Oıl» JShS-de 23 uńǵyma;

- «KMK Munaı» JShS-de 15 uńǵyma;

- «Óriktaý Opereıtıng» JShS-de 3 uńǵyma;

- «QazaqOılAqtóbe» JShS-de 5 uńǵyma. 

Aıta keteıik, sý synamasy sý tasqynyna deıin, sý tasqyny kezinde jáne keıin alynady. 

Eske salsaq, byltyr jeltoqsanda Aqtóbege ǵalymdar men tabıǵat janashyrlary jınalyp, munaı óndirilip jatqan «Kókjıde» ken ornyndaǵy taza sýdy qalaı saqtap qalýǵa bolatynyn talqylady. Qazirgi kezde munda 5 kompanııa «qara altyn» óndirisimen aınalysady. Jyl saıyn sýdyń lastaný deregi tirkelip tur.