Aqtóbede Kókjıde aýmaǵynan munaı uńǵymalaryn kóshirý jumysy ýaqytsha toqtatyldy
AQTÓBE. KAZINFORM – Sý qoryn saqtaýǵa baǵyttalǵan joba aıaqsyz qalýy múmkin. Ázirge tek 4 uńǵymanyń jumysy toqtatyldy.
Aqtóbe aýmaǵyndaǵy Kókjıde ken ornynda jerasty sýyn saqtaý jumysy birneshe jyl buryn bastaldy. 2021 jyly oblys prokýratýrasy «SNPS-Aqtóbemunaıgaz» AQ (10 uńǵyma), «KMK Munaı» AQ (68 uńǵyma), «Fırma Ada Oıl» JShS-niń (56 uńǵyma) jumysyn toqtatý sharasy bastalǵanyn habarlady. Alaıda bul jobanyń ózi qazir beımálim kúıde tur.
- QR Ekologııa mınıstrliginiń jobasy áli de ózekti. 2024 jyly «jyl saıyn uńǵymalardy birtindep toqtatý» jobasy qolǵa alynǵanymen, 2025 jyly oǵan qarsylyq bildirdi. Bar bolǵany 4 uńǵyma jumysy toqtatyldy. Sodan keıin gıdrogeologııalyq zertteý júrgizýge sheshim qabyldandy. Bul suraq qazir QR Sý resýrstary jáne ırrıgatsııa mınıstrligine qarasty bolyp tur, - dedi Aqtóbe oblystyq Ekologııa departamenti basshysynyń orynbasary Talap Usnadın.
Aıta keteıik, QR Sý resýrstary jáne ırrıgatsııa mınıstrliginiń tapsyrmasy boıynsha 2024-2025 jyldarda zertteý júrgizilip, qorytyndysy shyqty. Qorytyndy baǵalaý boıynsha, tehnogendik ózgeristerge ushyraǵan ýchaskeler alqap aýdanynyń shamamen 11%-yn alyp jatyr. Al qumnyń 89%-y tabıǵı kúıine jaqyn qalpynda saqtalǵan, ıaǵnı munaı-gaz óndirisi jerasty sýlaryna keri áserin tıgizbegen.
