Aqtóbede qoqystan tabylǵan shaqalaqtyń anasyna taǵylǵan aıyp alynyp tastaldy
Oqıǵa 2022 jyldyń 23 qazan kúni Aqtóbe oblysy Qarǵaly aýdanynda boldy.
Oblystyq PD baspasóz qyzmetiniń habarlaýynsha, Qarǵaly aýdany polıtsııasynyń kezekshi bólimine Qarǵaly aýdany Badamsha aýyly mańyndaǵy «Rojdestvo-Dóń» tasjolynyń boıynda ornalasqan qoqys polıgonynan qara polıetılen paketten shaqalaqtyń denesi tabylǵany anyqtaldy.
«Oqıǵa ornyna jedel tergeý toby jiberildi. Atalǵan fakti boıynsha Qazaqstan Respýblıkasy Qylmystyq kodeksiniń 100-baby, ıaǵnı «Anasynyń jańa týǵan náresteni óltirýi» boıynsha sotqa deıingi tergeý amaldary bastalyp, balanyń anasyn anyqtaý boıynsha jedel is-sharalar júrgizilip jatyr», - dep habarlady oblystyq PD baspasóz qyzmeti.
Arada 6 aı ýaqyt ótkende istiń qysqarǵany belgili boldy.
«Qylmystyq kodekstiń «Anasynyń jańa týǵan náresteni óltirýi» baby boıynsha is qozǵalǵanymen, saraptama qorytyndysynan keıin balanyń óli týǵany belgili boldy. Qylmystyq quram bolmaǵan soń is jabyldy»,- dedi Aqtóbe oblystyq PD baspasóz qyzmetiniń jetekshisi Erbolat Sarqulov.