Aqtóbede qoqysqa baılanysty turǵyndardyń shaǵymy kóbeıdi
AQTÓBE. QazAqparat -Aqtóbede kópqabatty úılerdiń aýlasyndaǵy qoqys ýaqtyly shyǵarylmaı jatyr. Buryn qoqys shyǵarǵan kompanııalar jumysyn toqtatyp, qala on ýchaskege bólindi, dep habarlaıdy QazAqparat tilshisi.
Aqtóbe qalasynyń turǵyndary apta boıy syrtqa shyǵarylmaǵan qoqysty sýretke túsirip, áleýmettik jelige salyp jatyr. Máselen, qalanyń Krasnogorskaıa, Jamanqulov, Koshevoı, Ábilqaıyr han, Rysqulov kósheleri men dańǵyldaryndaǵy jaǵdaı kóptiń shaǵymyn kúsheıtti.
Qala ákiminiń áleýmettik jelidegi resmı paraqshasy shaǵym túsken kóshelerdiń tazartylǵanyn habarlap otyr. Buryn qoqys shyǵarǵan kompanııa jumysyn toqtatyp, qazirgi ýaqytta Aqtóbe qalasy boıynsha qoqys shyǵarý jumystary basqa kompanııalarǵa júktelip jatyr.
«Aqjol LTD» JShS qoqys shyǵarý jumysyn toqtatý týraly habarlaǵan soń qala tazalyǵyn qamtamasyz etý úshin «Tabys Aqtóbe» jáne «BatysKomertsSpetsStroı» kompanııalary barlyq jumysty tegin atqarýǵa kelisim berdi. «Aqjol LTD» JShS qoqys shyǵarýdy osy jyldyń 1 mamyryna deıin jalǵastyramyz dep habarlaǵanymen, shyn máninde olaı bolmaı shyqty. Áleýmettik jelilerde shaǵymdanýshylardyń kóbeıgeni sony dáleldeıdi. Osy kezge deıin qala aýmaǵynan qoqysty 2 kompanııa, aýyldyq okrýgter aýmaǵynan 1 jeke kásipker shyǵaryp kelse, bul keı jaǵdaıda jumystyń sapasyna keri áserin tıgizdi. Kásiporyndar óte úlken aýmaqty tazartyp, keıde úlgermeı jatty. Osyǵan baılanysty Aqtóbe qalasy ákimdigi qoqys shyǵarý jumysynyń sapasyn arttyrýǵa baǵyttalǵan is-sharalardy qabyldap, konkýrstyq negizde kompanııalardy anyqtaýdy qolǵa aldy. Qala men eldi mekenderdiń aýmaǵy 10 ýchaskege bólinip, arnaıy tehnıkasy bar shaǵyn jáne orta bıznes ókilderiniń qatysýyna tıisti jaǵdaı jasaldy. Konkýrs nátıjesi boıynsha jaýapty kompanııalar anyqtalyp, jumysyn shuǵyl túrde bastap ketti. Qazirgi kúni bul kompanııalardyń qujattaryn rásimdeý jumystary júrgizilýde. Jýyq arada qala aýmaǵynda qoqys shyǵarý jumysy tıisti sapaly deńgeıge ótedi dep sendirgimiz keledi»,- dedi Aqtóbe qalalyq turǵyn úı-kommýnaldyq sharýashylyǵy bóliminiń baspasóz qyzmeti.
Aıta keteıik, Aqtóbe oblystyq qoǵamdyq densaýlyq saqtaý basqarmasy qoqystyń ýaqtyly shyǵarylmaýyna, sanıtarlyq talaptyń saqtalýyna jaýap bere almaıtyndaryn jetkizdi. Eger turǵyndar shaǵym túsirse, ol hatty jergilikti ákimdik pen jergilikti polıtsııa qyzmetine baǵyttaı alady.
