Aqtóbede qoqys tasymaldaıtyn kompanııalar tarıfti kóterýdi josparlap otyr
AQTÓBE. QazAqparat -Aqtóbede jolaqy baǵasymen qatar qoqys tarıfi kóterilýi múmkin. Turmystyq qatty qaldyqty shyǵarýshylar tarıfti 105 teńgeden 305 teńgege kóterýdi surady, dep habarlaıdy QazAqparat tilshisi.
Aqtóbe qalasynda qoǵamdyq tyńdaý ótip jatyr. Qoqys tasymaldaıtyn kompanııalar shyǵynnyń kóbeıgenin aıtyp, baǵany úsh ese kóterýdi surady.
«Qazir jergilikti ákimdik ókilderi, qalalyq máslıhat depýtattary men qoǵamdyq belsendi top músheleri aýlalardaǵy qoqys shyǵarý jumystaryn qarap, kompanııalardyń jumysymen tanysyp jatyr. Qoqystyń ýaqtyly shyǵarylǵany durys. Bizdiń talap osy. Sonymen qatar, qoqys shyǵarýshy kompanııalar shyǵynnyń artqanyn eskerip, baǵany kópqabatty turǵyn úılerge 305, jeke turǵyn úı alabyna 345 teńgege kóterýdi surady. Halyq pikiri eskerilip, sheshimdi qalalyq máslıhat depýtattary qabyldaıdy»,- dedi Aqtóbe qalasy ákiminiń orynbasary Qýandyq Qasymov.
Aıta keteıik, Aqtóbe qalasyndaǵy qoqysty shyǵaratyn kompanııalardyń biri jumysyn toqtatyp, ekinshisi qyzmet kórsetýden bas tartty. Mamyr aıynan beri qala aýmaǵy 10-ǵa bólinip, merdiger kompanııalardyń tizimi jarııalandy. Arnaıy tehnıkasy joq kompanııalar eki aıdan soń qyzmet kórsetýden bas tartyp, qala qoqysqa tola bastady. Qazir qala terrıtorııasy 4 bólikke bólinip, 3 kompanııa qyzmet kórsetip jatyr.
«2021 jylǵa qaraı Aqtóbe qalasynda qoqys óńdeý zaýyty salynady. Qazir 5-6 ınvestordyń usynysy qaralyp jatyr. Qalaǵa jańa konteınerler qoıyp, qyzmet kórsetý sapasyn arttyramyz. Ári qoqysty suryptaýǵa múmkindik beretin arnaıy konteınerler ákelinedi. Bárine ýaqyt pen qarjy qajet»,- dedi Qýandyq Qasymov.
