Aqtóbede qoqys shyǵarýshy kompanııalar taǵy shýlatyp jatyr
AQTÓBE. QazAqparat - Aqtóbede qoqys shyǵaratyn 10 kompanııa óz mindetin tolyq oryndaı almaı otyr. Osyǵan oraı qala turǵyndarynyń aryzy kóbeıgen, dep habarlaıdy QazAqparat tilshisi.
Eske salsaq, Aqtóbe qalasynda qoqys shyǵaratyn «Taza qala» kompanııasy bankrot bolyp, «Aqjol LTD» JShS da óz qyzmet kórsetýden bas tartqan bolatyn. Sol kezde jergilikti ákimdik qala terrıtorııasyn 10-ǵa bólip, onyń árqaısysyna qyzmet etetin kompanııany konkýrstyq negizde qaıta qabyldady. Olardy kópshilik aldynda tanystyryp, baılanys telefondaryn da taratty. Alaıda, bul kompanııalardyń qoqys shyǵaratyn arnaıy tehnıkasy bolmaı shyqty. Halyqtan aryz-shaǵymdar kóbeıgen.
Qoqystyń ýaqytyly shyǵarylýy men tazalyqty baqylaıtyn Aqtóbe qalalyq turǵyn úı-kommýnaldyq sharýashylyǵy bóliminiń baspasóz qyzmetiniń habarlaýynsha, turǵyndardyń aryz-shaǵymy eskerilip, qaldyqtardy shyǵarý jumystarymen aınalysatyn operatorlarǵa tekserý júrgizildi.
«Qazirgi kúni «NurKom-2020», «Sultanov» JK jáne №1 jáne №5 basqarýshy kompanııalarǵa eskertý berildi. Aldaǵy ýaqytta qoqys shyǵarý jumystary durys júrgizilmese - taǵy eskertý beriledi. Keste boıynsha tazalyq jumystary júrgizilýi tıis. Eger óz mindetin oryndaı almasa 10 ret eskertý berilip, keıin kompanııamen aradaǵy kelisimshart buzylady»,- dep habarlady baspasóz qyzmeti.
Aıta keteıik, qoqys shyǵarýdy óz mindetine alǵan basqarýshy kompanııalar kóliktiń az ekenin moıyndap otyr. №1 basqarýshy kompanııanyń basshysy Talǵat Qıbashtyń aıtýynsha, arnaıy kólik buzylyp, aýmaqqa bekitilgen 4 kólik turmystyq qaldyqty jınap úlgere almaı jatyr. Al №5 basqarý kompanııasy dıvan, kreslo, qurylys materıaldaryn shyǵarý úshin arnaıy tehnıka qajet ekenin jetkizdi.
