Aqtóbede qoqys polıgony janyp jatyr

AQTÓBE. QazAqparat – Aqtóbede qoqys polıgonynan taǵy da órt shyqty, dep habarlaıdy QazAqparat tilshisi.

Aqtóbe qalasyndaǵy jalǵyz qoqys polıgony taǵy da otqa orandy. Qazirgi kezde órt sóndirýshiler men merdiger kompanııa jumysshylary sóndirý jumystaryn júrgizip jatyr.

«Búgin saǵat 15:50-de qalalyq qoqys polıgonynyń órtengeni týraly aqparat tústi. Órt sóndirý qyzmetinen 8 adam men 2 tehnıka jiberildi. Sonymen birge seriktestiktiń 12 jumysshysy men 3 tehnıkasy jumyldyryldy. Qazirgi kezde sóndirý jumysy jalǵasyp jatyr. Shamamen aýmaǵy 500 sharshy metr bolady», - dep habarlady oblystyq TJD baspasóz qyzmeti.

Eske salsaq, 16 shilde kúni Aqtóbede qoqys polıgony órtenip, qalany kók tútin basqan edi. Oqıǵa ornyna órt sóndirý qyzmetinen 23 adam jáne 7 tehnıka jiberilgen bolatyn.