Aqtóbede qoqys polıgony taǵy janyp jatyr

AQTÓBE. QazAqparat – Aqtóbe qalasynda qoqys polıgony janyp jatyr. Órt sóndirýshilermen qatar polıgon qyzmetkerleri túnimen sý shashý, qum tógý jumystaryn júrgizip jatyr, dep habarlaıdy QazAqparat tilshisi.

Qoqys polıgonyndaǵy órt týraly aqparat túsken kezde oqıǵa ornyna tótenshe jaǵdaılar qyzmetinen 14 adam men eki tehnıka jiberilgen. Sonymen birge polıgonǵa jaýapty seriktestik te óz qyzmetkerleri men tehnıkasyn shyǵardy. Órt shyqqan aýmaqta túni boıy jumys júrdi. Byqsyp jatqan tútindi basý úshin mamandar áli de alańda júr.

Tamyz aıynyń basynda qoqys polıgonynda kezekti ret órt shyqqan bolatyn. Jalpy jyl bastalǵaly polıgonda 10 ret ot tutandy.

«Ekologtar sanıtarlyq baqylaý aımaǵynan tıisti ólshemderin alyp otyrdy. Máselen 12 tamyz kúni alynǵan synamalarda kómirtek totyǵynyń shamadan 2 ese artqany belgili boldy. Departament tarapynan ókiletti organǵa tıisti qujattar jiberdi. «Tabys» JShS-ǵa jospardan tys tekserý júrgizý úshin bul mańyzdy. Sebebi polıgon seriktestikke tıesili. Ony tekserýge ruqsat joq. Prokýratýra ruqsat berse, baramyz», - dedi Aqtóbe oblystyq Ekologııa departamenti memlekettik ekologııalyq baqylaý bólimi basshysynyń mindetin atqarýshy Marat Káribaev.

Aqtóbedegi qoqys polıgonynyń aýdany – 60 myń gektar. Búginde 800-1000 ga aýmaq janǵan.

«Kesheden bastap janyp jatyr. Qazirgi kezde munda órt sóndirýshilermen qatar polıgon jumysshylary júr. Tolyq sóndirý úshin qum tógip jatyrmyz. Aldaǵy ýaqytta munda jańa polıgon salynady», - dedi «Tabys Aqtóbe» JShS dırektorynyń mindetin atqarýshy Asanáli Haıdarov.