Aqtóbede qoqys polıgony órtenip, aýaǵa azot dıoksıdi tarady
AQTÓBE. QazAqparat – Eki kún boıy Aqtóbe qalasyn qoqys polıgonynan shyqqan tútin basyp, ekologtar aýaǵa azot dıoksıdiniń kóterilgenin anyqtady, dep habarlaıdy QazAqparat tildshisi.
Aqtóbede 24 qazan kúni qoqys polıgony órtenip, ol 25 qazanda tańerteń sóndirilgen bolatyn. Aýmaǵy 1200 sharshy metrdi qurady. Saldarynan qala ishin tútin basyp, oblystyq Tótenshe jaǵdaılar departamenti qala turǵyndary men qonaqtaryn qaýipsizdikti saqtaýǵa jáne asa qajet bolmasa dalaǵa shyqpaýǵa shaqyrǵan edi.
Ekologtar aýanyń lastanýyn tekserdi.
«24 qazan kúni habarlama keldi. 24-25 qazanda ınspektorlar qoqys polıgonyna baryp, jumys istedi. Kómirsýrektiń kóterilgeni anyqtalmady. Degenmen sol aýmaqta azot dıoksıdi kóterilgen. Al Aqtóbe qalasyna kómirsýtek pen azot dıoksıdiniń taralýy tirkelgen joq», - dedi Aqtóbe oblysy boıynsha bas ekologııa ınspektory Talap Ýsnadın.
Aıta keteıik, moratorııge baılanysty kásiporyndy tekserýge múmkindik joq. Sebebi turǵyndardan eshqandaı aryz-shaǵym túspegen.
«Oblystyq Ekologııa departamentine aryz túspegen soń, biz dál qazir tekserý jumystaryn júrgize almaımyz. Biraq oblystyq TJD-niń tekserý jumystarynyń nátıjesin kútip otyrmyz. Olardyń qorytyndysy shyqqan soń qandaı sheshim qabyldaıtynymyz belgili bolady. Zań boıynsha olar aýany lastaǵany úshin ákimshilik jaýapqa tartylady», - dedi Talap Ýsnadın.
