Aqtóbede kóktemgi sý tasqynyna daıyndyq júrip jatyr
AQTÓBE. KAZINFORM — Kúzde ylǵal normadan tómen boldy. Qazirgi kezde jerdegi tońnyń qalyńdyǵy 32-127 sm jetken. Tótenshe jaǵdaılar qyzmeti sonda da 2 myń adam, 800-den astam tehnıkany ázirledi.
Aqtóbe oblysy bıyl tasqyn qaýpi joǵary aımaqtar qatarynda joq. Oblystyq TJD basqarmasynyń basshysy Álisher Sarbaevtyń aıtýynsha, kúzde ylǵal normadan tómen boldy. Qazirgi kezde tońnyń qalyńdyǵy 32-127 sm bolyp tur. Bul qalypty.
— Jospar aıasynda ózen jaǵalaýlaryn nyǵaıtý, tazartý, tereńdetý jumystary isteldi. Qorǵanys bógetteri kóterilip, nyǵaıtyldy. Sý burý, káriz sýy arnasy salyndy, aryqtar tazartyldy. Qazirgi ýaqytta eldimekenderden 150 myń tonnadan astam qar shyǵaryldy. Aldaǵy ýaqytta ózenderde muz jarý jumysy josparlanǵan. Jarylys jumystary Oıyl, Úlken Qobda, Sholaq ózenderinde júrgiziledi. Sonymen birge kóktemge 2 myńnan astam adam, 800-den astam tehnıka daıyn. 400-den astam motopompa, 105 júzý quraly bar. Eki áýe kemesi ázir, — dedi oblystyq TJD basqarmasynyń basshysy Álisher Sarbaev.
Aqtóbe qalasynda tasqynǵa qarsy birqatar jumys isteldi. Sonyń ishinde sý basý qaýpi basym bolǵan baý-baqsha ujymdary mańynan ótip jatqan ózen arnasy tazartylyp, jaǵalaý bekitildi. Sý ótkizý qubyrynyń ornyna kópir salyndy.
— Aqtóbe qalasy Almaty aýdany boıynsha sý tasqynynyń aldyn alý sharasyna 500 mln teńgege jýyq qarjy qarastyryldy. Qazirgi kezde tasqynǵa qarsy jumys aıaqtalyp qaldy. Shyǵys turǵyn alabynda uzyndyǵy 3 km jýyqtaıtyn sý burý arnasy salyndy. Qýraıly turǵyn alabynda da dál sondaı jumys atqaryldy. Ólke men Avıator-5 aýmaǵynda ótkel salyndy. Aryqty qamys, shópten tazarttyq, endi qaryn alady. Barlyǵy 11 jerde qaýip bolǵan. Bárinde jumys atqaryldy, — Aqtóbe qalasy Almaty aýdany TÚKSh bóliminiń basshysy Almas Selýbaev.
Onyń aıtýynsha, Sút zaýyty men Qurmysh aýdandaryndaǵy turǵyndardan qar shyǵarý jumysyn uıymdastyrý týraly ótinishter túsip jatyr. Memlekettik satyp alý konkýrsynan soń bul jumys ta atqarylady.
Aqtóbe oblystyq TJD basqarmasynyń basshysy Álisher Sarbaevtyń aıtýynsha, óńirdegi iri sý qoımalary sý qabyldaýǵa daıyn. Sý qoımalaryndaǵy sý qory ázirge 32%-42% bolyp tur.
Aıta keteıik, elimizde 831 shaqyrym qorǵanys bógetteri salynyp, topyraq úıindileri turǵyzyldy. 1 myń shaqyrymnan astam drenaj júıeleri, arnalar men aryqtar jóndelip, qaıta salyndy. Avtomobıl jáne temirjol ýchaskelerinde 934 sý ótkizý qurylysy ornatylyp, aýystyryldy.