Aqtóbede kóktaıǵaqtan mertikkender sany 200-den asty
AQTÓBE. QazAqparat - Aqtóbede kóktaıǵaqtan qulap, mertikkender sany artty, dep habarlaıdy QazAqparat tilshisi.
Aqtóbe oblysyndaǵy kóktaıǵaq saldarynan júzdegen adam aýrýhanaǵa tústi. Qazirgi ýaqytta oblystyq jedel járdem aýrýhanasynyń qabyldaý bólimi lyq toly. Munda biri aıaǵyn, ekinshisi qolyn syndyryp kelip jatyr. Dárigerler de kúsheıtilgen tártippen jumys isteýge kóshken.
«Rentgenge 60 adam kezekke turǵan soń ekinshi rentgen kabınetinde qabyldaý bastaldy. Dárigerler de kúsheıtilgen tártippen jumys istep jatyr. Eger jaǵdaıy aýyr bolsa, biz olardy aýrýhanaǵa jatqyzamyz. Al synyǵy jeńil bolsa, olardy emhana baqylaýyna beremiz. Aqtóbe oblystyq jádel járdem aýrýhanasyna tańǵy saǵat 7:30-dan bastap zardap shekkender kelip jatyr. Kóktaıǵaq saldarynan qabyldaý bólimshesindegi dárigerler sany kóbeıdi. Qazir 3 travmatolog, 3 neırohırýrg, bir nevrolog, eki terapevt, eki hırýrg bar. Adam óte kóp. Esep boıynsha 3-4 saǵatta 200 adam kómek aldy»,- dedi Aqtóbe oblystyq jedel járdem aýrýhanasynyń bas dárigeri Raqymjan Arystan.
Kóktaıǵaq kezinde qulap, aıaq-qolyn zaqymdaǵandar arasynda jastar da, úlken adamdar da bar. Olardyń biri jumysqa bara jatqan jolda qulasa, biri úıinen shyqqan boıda qolyn syndyryp alǵan.
«Úıden shyqqan boıda qulap, qolymnyń synyp qalǵanyn kórdim. Jedel járdem shaqyrǵan boıda kelip, ekpe jasady. Endi gıps saldyramyn. Ózin 76 jastamyn. Qolym eki ret, bir ret aıaǵym da syndy. Bul kúni abaı bolýy kerek, biraq bári kútpegen jerden boldy»,- dedi turǵyn Sara Aımasheva.
Aıta keteıik, Aqtóbede kóktaıǵaq saldarynan kólikterdiń, avtobýstardyń júrýi qıyndaı tústi. Áleýmettik jelide qoǵamdyq kólikterdiń jolda taıyp ketip, turǵyndardyń kómek berip jatqanyn kórýge bolady. Sonymen qatar, joldar jabylyp, respýblıkalyq tasjoldy kezekshilik qoıyldy. Polıtsııa joldy baqylaýǵa aldy.
