Aqtóbede kóktaıǵaq saldarynan oblystyq mańyzy bar joldar jabyldy
AQTÓBE. QazAqparat – Aqtóbe oblysynda birneshe baǵyttaǵy joldar jabyldy. Oblysta qazir kóktaıǵaq, dep habarlaıdy QazAqparat tilshisi.
Aqtóbe oblystyq tótenshe jaǵdaılar departmenti baspasóz qyzmetiniń habarlaýynsha, respýblıkalyq, oblystyq mańyzy bar tórt jol jabyldy. Saǵat 18:45-te jańbyr arty kóktaıǵaqqa ulasyp, «Qobda-Mártók» tas jolynyń 0 shaqyrymynan 82-shaqyrymyna deıingi aralyǵy jabyldy. Dál osy ýaqytta «Aqtóbe-Bolgarka-Shubarqudyq» tas jolynyń 16,5 shaqyrymynan 191 shaqyrymyna deıingi aralyqta barlyq avtokólik túrine qozǵalys toqtatyldy.
«Kún raıynyń nasharlaýyna baılanysty oblystyq mańyzy bar «Shubarqudyq-Qobda-Sol Iletsk» tas jolynyń 125 shaqyrymynan (Oıyl aýyly) 265 shaqyrymyna deıin (Qobda aýyly) barlyq avtokólik túrine qozǵalys shekteldi. Jolǵa shyǵý óte qaýipti ekenin eskertemiz», - dep habarlady oblystyq TJD baspasóz qyzmeti.
Al, saǵat 21:20-da respýblıkalyq mańyzy bar «Aqtóbe-Orsk» tas jolynyń 39 shaqyrymyndaǵy Sh. Qaldaıaqov aýylynan RF shekarasyna deıin júk jáne jolaýshy avtokólikteri úshin qozǵalysqa shekteý qoıyldy.
