Aqtóbede kóktaıǵaq saldarynan 60 kólik halyqaralyq kúre joldy jaýyp tastady
AQTÓBE. QazAqparat - Aqtóbede «Samara-Shymkent» kúre jolynyń Ólke-Aqjar aýyly aralyǵynda jol jabyldy. Kóktaıǵaq kesirinen órge shyǵa almaı qalǵan júk kólikteri kepteliske sebepker boldy, dep habarlaıdy QazAqparat tilshisi.
Aqtóbede aýa raıy kúrt ózgerdi. Búgin óńirde qar aralas jańbyr jaýyp tur. Al «Samara-Shymkent» halyqaralyq tasjolynyń Hromtaý-Badamsha tasjoly jabyldy. Qazirgi ýaqytta Ólke-Aqjar aýylynda 60 kólik turyp qaldy.
«Búgin jol kóktaıǵaq bolyp, júk kólikteri órge qaraı kóterile almaı qalǵan. Saldarynan keptelis boldy. Júk kólikteri júre almaı qalǵan soń jeńil mashınalar da ári-beri ótpeı, bir jerde toqtap tur. Qazirgi kúni «QazAvtoJol» mekemesiniń jumysshylary oqıǵa ornyna jetti. Olar tuz, qum tósep, jaǵdaıdy retteıdi»,- dedi oblystyq tótenshe jaǵdaılar departamentiniń baspasóz hatshysy Dınara Atraýbaeva.
Aıta keteıik, qazirgi ýaqytta Aqjar aýyly men Hromtaý, Aqtóbe qalasynan shyqqan arnaıy qutqarýshylar kólik qozǵalysyn retteý jumysyn júrgizip jatyr.
