Aqtóbede kóktaıǵaq kezinde aıaq-qoly synǵandar aýrýhanada jatyr

Aqtóbe kópsalaly aýrýhanasynda kóktaıǵaq kezinde kómek suraǵandar sany úsh ese artqan. Bir táýlikte munda 150 adam kelse, onyń 101-i taıyp qulap, qolyn, aıaǵyn shyǵaryp, syndyryp alǵan. Bas-mı jaraqatyn alǵandar da bar, dep habarlaıdy Kazinform.

Aqtóbe oblystyq TJD-i 4-jeltoqsan kúni kóktaıǵaq bolatynyn aıtyp, aldyn ala eskertý jasady. Tańerteń jumysyna asyqqan aqtóbelikter qansha saqtanǵanymen, aýrýhanaǵa tústi.

- Kóktaıǵaq saldarynan bir táýlikte 101 adam keldi. Onyń 48-ine jabyq synyq dıagnozy qoıyldy. Bas-mı jaraqaty, mı shaıqalýy da boldy. Mundaı 11 adam bar. Jeńil jaralanǵany, denesi kógergeni, terisin jyryp ketkeni de boldy. Aıaq-qoly shyǵyp ketkeni de kezikti. Barlyǵy 17-i adam aýrýhanaǵa jatqyzyldy. Olardyń súıegi synǵan bolǵan soń jedel kómek kórsetildi. Al saýsaǵy, shyntaǵy synǵandarǵa gıps salynyp, ambýlatorly túrde em qabyldaýǵa jiberildi. Olardyń sany - 78,- dedi Aqtóbe oblystyq kópsalaly aýrýhanasy qabyldaý bóliminiń meńgerýshisi Juldyz Rahmetova.

Sonymen birge kóktaıǵaqta zardap shekken alty naýqas aýrýhanaǵa jatýdan bas tartqan. Olardyń keıbiri otbasyna alańdasa, keıbiri emniń ózge túrin qabyldamaq oıyn aıtqan.

- Keshe rentgen, travpýnkt aldynda kezek boldy. Sebebi ózge ýaqytta kúnine aýrýhanaǵa 60-70 adam kelse, sol kezde 150 adam kómek surady. Onyń 101-i taıǵaq kezinde zardap shekken. Búgin jaǵdaı qalypqa keldi,- dedi Juldyz Rahmetova.