Aqtóbede kókpar ulttyq oıyny kenje damyǵan

Qazir bar kúsh «Kókpar» ulttyq oıynyn damytýǵa baǵyttalǵan, dep habarlaıdy QazAqparat tilshisi.

 №10 at sporty túrleri boıynsha oblystyq balalar jáne jasóspirimder mektebi Naýryz merekesine oraı ortalyq saıabaqqa aǵash úı tikti. Búgin qala turǵyndary men qonaqtaryna ulttyq sport túrleri boıynsha jarystar ótkizip, uıymdastyrý osy mektep ujymynyń mindetine júktelgen. Mekteptegi sport sheberleri men shákirtter Naýryz merekesine oraı daıyndyqty eki kún buryn bastady.

 

Sport mektebinde qazir 372 bala bar. Olar teńge ilý, aýdaryspaq, jamby atý, kókpar úıirmelerine qatysady. Sonymen qatar, qazaq kúresi men toǵyzqumalaq úıirmelerine barady.

«At sporty túrleri boıynsha oblystyq balalar jáne jasóspirimder mektebiniń ataýyn ulttyq sport dep ózgertý jumystary júrgizilip jatyr. Buryn janymyzdaǵy ıppodrom jekeniń qolynda boldy. Ony qaıtaryp, bizge berip jatyr. Jabyq manej salyndy, endi qysy-jazy daıyndyqty úzdiksiz júrgizýge múmkindik bar. Jetistikterimiz de az emes. Álıhan Báshimbaev teńge ilýden 7 dúrkin QR chempıony, Azııa birinshiliginiń kúmis júldegeri. Aýdaryspaqtan Arman Saǵymbaev, Shyńǵys Erjanov bar. Olar jasóspirimder arasynda QR chempıony. Mektepte 45 at bar. Onyń 12-si kókparǵa arnaıy bólingen»,- deıdi №10 at sporty túrleri boıynsha oblystyq balalar jáne jasóspirimder sport mektebiniń dırektory Baqtııar Tóleýov.

Balalar ártúrli. Olardyń biri úıirmege jazylyp, keıin ketip qalady. Basym bóligi attan alys uzamaı, jattyǵýlarǵa úzbeı qatysady. Talap boıynsha mektep shákirtterdi qyrkúıek aıynda jınap, tárbıeleıdi. Jyl ortasynda qosylýǵa múmkindik joq. Ári barlyq úıirmeler tolyq, kezek kútip júrgen balalar da bar.

 

«At sporty mektebine kelgen bala aldymen atqa minip úırenedi. Keıin kókparshylar, aýdaryspaqshylar dep bólek, ıkemine qaraı kásibı jattyqtyramyz. Bir qýantarlyǵy, shákirtterimiz báıge attarynda shaýyp júr»,- dedi B.Tóleýov.

Sport mektebindegi attardyń barlyǵy - taza qandy jylqylar. Keıbiri Reseıden ákelingen. Ereksheligi, báıgege emes, kókpar tartýǵa basymdyq berildi.

«Attardyń barlyǵy alyndy, jetkilikti. Biz báıgege qatystyrmaımyz. Ulttyq sportty kóterý maqsatynda kókpar, aýyryspaq, teńge ilý, jamby atýǵa shyǵaramyz. Kókpardyń aty bólek. Oǵan bala minýge bolmaıdy. Jarystarǵa daıyndap, semirtip, jilik maıyn toltyryp, baby kelgennen keıin ǵana  qosamyz. Máselen, 40 kún jilik maıyn jınaý úshin turatyn bolsa, ári qaraı 100, 500 metr júrgizip, daıyndaıdy. Sodan keıin kókparǵa qosamyz. Bir ókinishtisi, óńirde kókpar sporty kenje damyp kele jatyr. Ońtústik óńirde jaqsy damyǵan. Ol jaqta toı, úlken as bolatyn bolsa, kókpar iledi. Bizde báıge jarys ótedi. Qaltaly azamattardyń bári báıge atyn ustaıdy»,- dedi B. Tóleýov. Onyń aıtýynsha, elimizdiń ońtústiginde 1 myń  jigitten 100 jigit, 100 jigitten 10 jigit irikteledi eken. Tańdaý bar, myqtylar top jarady.  Al Aqtóbede irikteý ótpeıdi. Bári sport mektebiniń shákirtteri, ustazdary. «Bizdiń óńirde mektepten kim shyǵady, sol qatysady. Іrikteý joq. Kókpardan tuńǵysh sport sheberimiz Nurlan Dodaı bar. Qazir shákirtter jattyqtyrýshy qyzmetin atqaryp júr. Shyńǵys Erjanov, Arman Saǵymbaev ulttyq sportty damytýǵa úles qosyp keledi»,- dedi mektep dırektory.

 

Sport mektebine qyzdar da barady. Buryn qyz qýý ótip turatyn. Keıin taza qandy attar jarysqa túsip, qyzdardyń qaýipsizdigi eskerildi. Qyz qýý sport túrinen alynyp, jamby atý engizildi. Degenmen, bul shekteý qyzdardyń qyzyǵýshylyǵyn tómendetpedi. Áserese, orys ultynyń qyzdary janýarǵa jaqyn. Olar tańerteń kelip, keshke deıin at kútimin jasaýǵa sheber.

«Ulttyq sport túrleri degende asyq atýdy qosady. Jarystarǵa shyǵaramyz. Biraq erejesi mınıstrlikte bekitilmegendikten sport sheberine úmitker, sport sheberi degen ataq berilmeıdi. Qazir negizgi kúshti kókparǵa saldyq. Atyraý, Mańǵystaýda úlken deńgeıde damyp jatyr. Olar eresekter arasynda úzdik úshtikke kiredi. Ózderi klýb ashqan, qymbat attardy klýb qarjysyna alǵan. Sonymen qatar, ońtústikten legıoner shaqyrylǵan. Olarǵa 100-150 myń teńge jalaqy beredi. Bizde ondaı múmkindik joq. Bir mektep, eshqandaı básekelestik baıqalmaıdy.  Máselen, kúresten irikteledi, myqtylar anyqtalady. Bizder tek  óz balalarymyzdy aparamyz. Sońǵy kezde Qobda, Taldysaı, Eńbekshi degen aýyldar  kókpar ótkizip jatyr. Jeke at alyp, syılyq tigip, jarys ótkizedi.  Balalardy tájirıbe jınasyn dep jiberemiz»,- dedi B. Tóleýov.

Sport mektebi múmkindigi shekteýli balalarǵa arnap ıppoterapııa emin jasaıdy. Arnaıy tórt adam oqytylyp, olar jyl saıyn júzden astam balanyń densaýlyǵyn nyǵaıtý úshin jumys istep júr.

 

Sport mektebiniń shákirtteri men oqytýshylaryn alda úlken jarystar kútip tur. Bıyl qyrkúıek aıynda Aqtóbede «Aqbıdaı» ótedi. Ázirlik bastaldy. Sonymen qatar, «EKSPO-2017» kórmesine oraı kókpardan álem chempıonaty ótedi. Teńge ilýden Azııa birinshiligi uıymdastyrylady. Aqtóbelik sportshylar osy jarystardyń barlyǵyna qatysyp, baq synaıdy.