Aqtóbede qoqys mańynan tabylǵan balany asyrap aldy
AQTÓBE. KAZINFORM — Batyr esimdi sábı «Úmit» balalar úıinde birer apta ǵana boldy. Derekterdi portalǵa salǵan sátten-aq asyrap alýǵa ótinish túsken.
Aqtóbeniń Turǵyndar qalashyǵy aýdanynan tabylǵan shaqalaq áýeli Qalalyq balalar aýrýhanasynda em qabyldap, 10 maýsym kúni balalar úıine jiberildi. Batyr esimdi sábı balalar úıine túsken soń qujattary rásimdelip, asyrap alýshylar tabyldy.
— Sábı balalar úıine 10 maýsym kúni tústi. Sodan keıin týý týraly kýáligi daıyn bolyp, bala asyrap alý portalyna tirkeldi. Ótinish bildirgen adam kelip, balany kórdi, kezdesti. Keıin ótinishi zań aıasynda qanaǵattandyryldy. Balany aldyńǵy aptada alyp ketti, — dedi «Úmit» balalar úıiniń bas dárigeri Serik Aıtýkın.
Aqtóbe oblystyq polıtsııa departamenti baspasóz qyzmetiniń habarlaýynsha, ázirge balanyń týǵan anasy tabylmady. Іzdestirý jumysy áli jalǵasyp jatyr.
Eske salaıyq, bıyl mamyr aıynda Aqtóbede qoqys mańynan shaqalaq tabyldy. Jańa týǵan náresteniń salmaǵy 2 900 gramm boldy. Ol jedel járdem brıgadasymen aýrýhanaǵa jetkizildi.
