Aqtóbede qoqys shyǵara almaı otyrǵan turǵyndar ákimdikten kómek surady

Aqtóbe qalasy irgesindegi Turan turǵyn alabynyń turǵyndary búgin ákimdik aldyna jınaldy. Ondaǵan turǵyn 500 úıdiń máselesin kóterdi. Turǵyndar 5 jyldan beri qoqysty qaıda tasıtynyn bilmeı, kómip, órtep keledi. Keıde qala ishindegi qoqys jáshikterine tasymaldaıdy.

— Turǵyn alaptaǵy kósheniń shet jaǵynda turamyn. Osy problemanyń sheshilmeı turǵanyna 5 jyl boldy. Adam bar jerde, turǵyn úı bar jerde qoqys shyǵady. Sondyqtan bizge qoqysty jınaıtyn jaǵdaı jasap berýi kerek. Qazir shuńqyr qazyp kómedi, órteıdi, — dedi turǵyn Baǵılash Eshpanova.

Al Sándiǵalı Ábdiǵalıevtiń aıtýynsha, keıde qoqys aınala shashylyp qalady. Jazdyń aptap ystyǵynda shirip, ıistenip te ketip jatyr.

— Bizdiń sergeldeńde júrgenimizge on shaqty jyl boldy. Aıtylady, biraq sol kúıi qalady. Balalarǵa jınap qoıamyz, sosyn olar qalaǵa tasıdy. 2-3 kún, bir apta boıy jınalady, — dedi ol.

Aqtóbe qalasy Astana aýdanynyń ákimin bir saǵat boıy tapjylmaı kútken turǵyndar ár adamǵa aı saıyn 450 teńge tóleýge kelisti. Qoqys tasymaldaıtyn mekeme de kelisimshart jasaýǵa ýaǵdalasty.

— Qoqys shyǵaratyn arnaıy kompanııa bar. Jeke kompanııa ataýy — «Neo plıýs». Olar jumys isteýge daıyn. Turan aýylynda adamdar áli tolyq qonystanyp bolǵan joq. Munda 500-ge jýyq úı bar. Jalpy jańadan qonystanyp jatqan aýyldarda adamdar jumysqa ketip bara jatqanda ózimen birge ala shyǵyp, qalanyń basqa alańdaryna tastap júr. Odan bólek qoqysty aýlasyna jınap, kóktemde, kúzde eki aılyq jarııalanǵanda polıgonǵa tasıdy, — dedi Almaty aýdanynyń ákimi Baıanbek Qyryqbaev.

Eske salaıyq, buǵan deıin Aqtóbe oblysynyń mamandandyrylǵan tabıǵat qorǵaý prokýratýrasy júrgizgen tekserý barysynda Aqtóbe qalasynan 32 ruqsat etilmegen qoqys alańy anyqtalǵanyn habarlaǵanbyz. Zań buzýshylyqtar boıynsha eki aýdan ákiminiń orynbasary ákimshilik jaýapkershilikke tartylyp, qoqys úıindilerin joıý jumystary bastaldy.