Aqtóbede qoqys mańynan tabylǵan er adamnyń ólimine qatysty sot otyrysy bastaldy
AQTÓBE. KAZINFORM – Aıyptalýshy óz tanysyn óltirgen soń denesin sómkege salyp qoıǵan. Keıin shanaǵa artyp, qoqys jáshiginiń mańyna laqtyryp ketken. Qylmystyq istiń mán-jaıy sotta aıtyldy.
Aqtóbe oblystyq qylmystyq ister jónindegi mamandandyrylǵan aýdanaralyq sotynda qoqys jáshigi mańynan tabylǵan er adamnyń ólimine qatysty is boıynsha basty sot talqylaýy ótti. Qylmystyq kodekstiń 99-baby 1 bóligi, ıaǵnı, adamdy qasaqany qazaǵa ushyratý isinde 63 jastaǵy er adam kúdikke ilikti.
Іs materıalyna súıensek, oqıǵa bıyl 21 aqpan kúni boldy. Sottalýshy óz úıinde jábirlenýshimen birge ishimdik ishken. Ekeýi sózge kelip, janjaldasyp qalady. Arada biraz ýaqyt ótkende sottalýshy uıyqtap ketip, soqqydan oıanady. Jábirlenýshiniń bul áreketine ashýlanǵan sottalýshy pyshaq ustap turǵan qolyn qaıyryp, oǵan tyǵyp alady. Sol jaq keýde tusyna birneshe soqqy jasaǵan kezde jábirlenýshi oqıǵa ornynda qaza tapty.
- Sottalýshy jasaǵan qylmysyn jasyrý maqsatynda onyń denesin aq-qara tústi sómkege salyp qoıady. Odan ári máıitti tasý úshin shana alyp, páterine ákeledi. 24 aqpan kúni saǵat 04:00 shamasynda óziniń qylmystyq is-áreketin jasyrý maqsatynda jábirlenýshiniń denesi salynǵan aq-qara tústi sómkeni shanaǵa salyp, aǵaıyndy Jubanovtar kóshesindegi qoqys jáshigine tastap ketken,- dedi memlekettik aıyptaýshy.
Aıta keteıik, qoqys mańynan er adamnyń denesi tabylǵany jónindegi aqparat bıyl 12 naýryzda belgili boldy. Arada bes kún ótkende kúdikti ustaldy.
