Aqtóbede qoǵamdyq kóliktiń jolaqysy qymbattaıdy
AQTÓBE. QazAqparat -Aqtóbe qalasyndaǵy qoǵamdyq kóliktiń jolaqysy 80-90 teńge bolýy múmkin. Óńirdegi jolaýshylar tasymalymen aınalysatyn kompanııalardyń usynysyn oblystyq máslıhat qarap jatyr, dep habarlaıdy QazAqparat tilshisi.
Aqtóbe qalasynda jolaýshylar tasymalymen aınalysatyn «Avtopark» JShS men «Qalalyq jolaýshylar tasymaly kásiporny» JShS búgin tarıfti kóterýge usynys bergenderin jetkizdi. Qazir qos kompanııanyń usynysyn oblystyq máslıhat qarap jatyr.
«Sońǵy jyldary tarıfti kóterý týraly usynys berip kelemiz. Sońǵy ret jolaqy 2014 jyldyń mamyr aıyna kóterildi. Sodan beri tasymaldaýshy kompanııanyń shyǵyny 150, keı jerde 200 paıyzǵa ósti. Qala tasymalyndaǵy 55 teńge óte arzan ári shyǵyndy jappaıdy, avtoparktiń tehnıkasyn jańartýǵa jetpeıdi, eńbekaqy kótere almaımyz»,- dedi «Avtopark» JShS zańgeri Rýslan Jylqamanov.
Aqtóbe qalalyq ákimdigi avtoparkterge avtobýstardy jańartýǵa tapsyrma bergen bolatyn. Buǵan deıin habarlaǵanymyzdaı, «Qalalyq jolaýshylar tasymaly kásiporny» JShS-i 70 avtobýs satyp aldy. Al «Avtopark» JShS-i jańa 35 avtobýs ákeldi.
«Tamyz aıynyń alǵashqy jartysynda tarıf kóteriledi dep josparlap otyrmyz. Aqtaý, Atyraý, Qostanaı oblystaryna qarap, jolaqy 80-90 teńge bolady degen boljam bar. Tarıf kóterilse, elektrondy bılet engizý mindeti qoıylady. Bul - qalalyq ákimdiktiń talaby»,- dedi Jylqamanov.
